VOV4.Êđê- Aguah hruê 1/7, Êpul gơ̆ng bruă mnuih ƀuôn sang čar Lâm Đồng gưl X, wưng thŭn 2021 – 2026 mkŏ mjing leh Klei bi kƀĭn tal sa čiăng ruah phung khua dôk hlăm klei dưi lehanăn bi mklă dŭm mta hră m’ar yuôm bhăn. Ti anôk bi kƀĭn, Dhar bruă ruah khua čar Lâm Đồng hưn mthâo leh boh tŭ hdră ruah khua, bi mklă k’hưm lehanăn jao hră bi mklă kơ 66 čô bi ala Êpul gơ̆ng bruă mnuih ƀuôn sang čar gưl X, wưng thŭn 2021–2026.

Phung bi ala ăt hluê ngă hdră mplĕ hră ruah phung khua kmeh gơ̆ng hlăm Êpul gơ̆ng bruă mnuih ƀuôn sang čar lehanăn Anôk bruă sang čư̆ êa čar, ruah Khua, K’iăng khua adŭ bruă thơ̆ng kơ bruă hdră bhiăn, bruă duh mkra – ngăn prăk, bruă Dhar kreh – ala ƀuôn lehanăn Anôk bruă Djuê ana lehanăn phung khua hlăm Anôk bruă sang čư̆ êa čar. Trần Đức Quận, khua hlăm Anôk bruă Đảng gưl dlông, Khua bruă Đảng čar, Khua kiă kriê Êpul gơ̆ng bruă mnuih ƀuôn sang čar gưl IX lŏ dưi djŏ ruah ngă Khua kiă kriê Êpul gơ̆ng bruă mnuih ƀuôn sang čar gưl X; Trần Văn Hiệp, K’iăng khua bruă Đảng čar, Khua anôk bruă sang čư̆ êa čar gưl IX dưi ruah ngă Khua anôk bruă sang čư̆ êa čar gưl X, wưng thŭn 2021- 2026.

Klei bi kƀĭn lŏ pioh mmông bi trông lehanăn bi mklă dŭm hdră mtrŭn kơ Hdră kčah mkŏ mjing dŭm klei bi kƀĭn grăp gưl hlăm thŭn 2021 mơ̆ng Êpul gơ̆ng bruă mnuih ƀuôn sang čar gưl X. Hdră mtrŭn ăt bi mklă hdră kah mbha hdră kčah duh bi liê dŭm bruă knŭk kna wưng man dưn hlăm thŭn 2021- 2025./.

Pô mblang: H’Nêč Êñuôl