VOV4.Êđê- Hŏng hnơ̆ng dưi mgơ̆ng 3,2 êklăk m3 êa, mkăp kơ bruă krih kơ 600 ha djam mtam, mnơ̆ng dhơ̆ng, knơ̆ng kdơ̆ng êa Proh hlăm să Prŏ, kdriêk Đơn Dương, čar Lâm Đồng dôk ti anăp boh klei huĭ srăng luič klei êđăp ênang hlăm yan hjan êa lip kyua mâo arăng ksĭng mmiă lăn kjham.

Knơ̆ng kdơ̆ng êa Proh, ti să proh, kdriêk Đơn Dương, čar Lâm Đồng hlăk jhat rai kyua tuôm hŏng klei bi rai. Êlan đĭ nao dlông knơ̆ng kdơ̆ng êa mčah leh asei êlan, jing dŭm ƀlŭng êa êlam kyua êdeh prŏng mdiăng ktrŏ dŭ čuah dŭ lăn. Mbĭt hŏng anăn, klei bi mbŏ lăn, duah tuh lăn hlăm ênao mgơ̆ng êa ăt mâo hlăm lu anôk, anăp ba klei amâo mâo jăk ôh kơ knơ̆ng kdơ̆ng êa. Jih jang bruă ngă anei mâo leh mơ̆ng sui, ƀiădah bruă sang čư̆ êa alŭ wăl, lehanăn dŭm anôk bruă djŏ tuôm ăt ka mâo ôh bruă ngă hŏng klei tŭ dưn, čiăng ƀư̆ mkra, mghaih msir, knŏng duah msir mă hơăi mang, khă bi leh klei bhiăn.

Đỗ Phú Hoà, knuă druh Anôk bruă kiă kriê lehanăn ba yua êa jua Đơn Dương, jing anôk kiă kriê knơ̆ng kdơ̆ng êa Proh brei thâo, grăp blư̆ hmao ƀuh dŭm klei ngă soh, snăn êpul êya ngă leh hră mơar, lehanăn akâo kơ bruă sang čư̆ êa să mghaih msir. Siămdah, lu boh klei mâo dôk bi ding dang, mghaih msir amâo mâo sĭt êmĭt ôh, kyuanăn yơh klei bi ksĭng mmiă, klei bi rai knơ̆ng kdơ̆ng êa lĕ hlăm klei amâo lŏ uêñ ôh. Đỗ Phú Hoà hưn, ară anei mâo leh ƀiă êdi truh 35 gŏ êsei bi ksĭng mmiă lăn hlăm wăl êđăp ênang pioh kơ bruă răng mgang kơ knơ̆ng kdơ̆ng êa:

“Snăn hlăm bruă kiă kriê knơ̆ng kdơ̆ng êa, jih jang klei ngă amâo mâo djŏ anăn kbiă hriê mơ̆ng lu mta. Tơdah mâo mtam dŭm bruă ngă amâo mâo djŏ hŏng knơ̆ng kdơ̆ng êa, drei mâo mtam hdră mghaih msir ktang, sĭt nik boh klei anei amâo mâo tưl truh msĕ si ară anei ôh. Ară anei hlăk hlê lăn mâo ênoh đĭ yuôm, snăn dơ̆ng mâo nanao yơh klei duah čhuak. Tơdah ăt kăn mghaih msir hŏng klei ktang rei, sĭt nik mgi dih ăt nanao snăn, dleh dlan yơh dưi kiă kriê knơ̆ng kdơ̆ng êa anei”.

Mnuih ƀuôn sang ba masin hli lăn giăm knơ̆ng bruă pui kmlă Proh

Kbiă hriê mơ̆ng klei mghaih msir amâo mâo ktang, kƀat klei kut kat mơ̆ng bruă sang čư̆ êa să Proh snăn klei bi ksĭng mmiă lăn hlăm wăl knơ̆ng kdơ̆ng êa Proh mâo hĕ hlăk hrue 11/4/2021. Leh hmao ƀuh Nguyễn Xuân Hải, dôk ti wăl krah Thạnh Mỹ, kdriêk Đơn Dương amâo mâo huĭ mtam ba êdeh dôk čuk hli lăn, ba kdơr hlăm ênao êa. Anôk bruă kiă kriê knơ̆ng kdơ̆ng êa Đơn Dương mâo leh klei kăm ghă, akâo kơ knơ̆ng bruă sang čư̆ êa să Proh ngă hră mơar lehanăn mghaih msir. Siămdah truh kơ ară anei, êngao kơ klei đŭ mă 200 êbâo prăk, pô nă soh ka lŏ kuai wĭt bi hnô msĕ si hđăp ôh anôk čuk hli anăn. Lač kơ klei êmưt mghaih msir anăn, Châu Văn Kỳ, khua knơ̆ng bruă sang čư̆ êa să Proh lač, amâo mâo klei duah mgang, amâodah ngă ngơi lui hĕ boh klei adôk nanao snăn. Kyua ñu mrâo hriê kiă kriê mă bruă dua mlan hŏng anei, snăn adôk ka thâo nik jih ôh boh klei. Ñu lač srăng pral mghaih msir bi leh klei anei hlăm wưng kơ anăp.

“Kyua mâo knơ̆ng kdơ̆ng êa anei mâo êa krih kơ să anei, wăt să adih jing yuôm bhăn êdi, ƀiădah klei dleh kơ anei jing si srăng ngă dưi mghaih msir mtam mơ̆ng akŏ, kyuadah mnuih anei bi ksĭng mmiă tinei, snăn srăng mâo mnuih mkăn bi ksĭng mmiă ti adih mơh. Kyuanăn yơh hdră kơ anăp, tơdah pô anăn ăt lŏ ngă soh mơh, sĭt nik srăng mâo hdră đŭ bi kmhal ktang hĭn”.

Ti anăp klei knơ̆ng kdơ̆ng êa Proh tuôm hŏng klei bi ksĭng mmiă bi rai, Anôk bruă kiă kriê knơ̆ng kdơ̆ng êa Đơn Dương mâo leh lu hră mơar akâo kơ dŭm anôk bruă djŏ tuôm đru bi gang mkhư̆, kăm dŭm boh êdeh prŏng dŭ mdiăng mnơ̆ng ktrŏ găn dlông knơ̆ng kdơ̆ng êa. Lehanăn, akâo leh kơ knơ̆ng bruă sang čư̆ êa mghaih msir bi ktang klei ngă soh hlăm knơ̆ng kdơ̆ng êa, bi ksĭng mmiă wăl anôk êđăp ênang pioh răng kriê knơ̆ng kdơ̆ng êa. Kyuadah klei anei ăt lŏ dôk nanao sĭt nik srăng hmăi amâo mâo jăk prŏng êdi kơ bruă ba yua knơ̆ng kdơ̆ng êa, lehanăn knơ̆ng kdơ̆ng êa anei anăp srăng lĕ hlăm klei jhat rai mtam hlăm yan hjan kơ anăp./.

Pô mblang: Y-Khem Niê