VOV4.Êđê -   Tlam 23/4, ti Wăl hiu čhưn ênguê Làng Nấm Đà Lạt, Knơ̆ng bruă dhar kreh mjuăt ktang asei mlei leh anăn hiu čhưn ênguê čar Lâm Đồng mkŏ mjing leh knăm krŭ wĭt klei bi kuôl djuê ana K’Ho. Anei jing sa hlăm dŭm bruă ngă hlăm Hdră mkŏ - mđĭ kyar bruă hiu chưn ênguê plah wah Lâm Đồng leh anăn dŭm alŭ wăl hlăm kluôm ala.

Hdră krŭ wĭt klei bi kuôl ung mô̆ djuê ana K’Ho mâo êpul êya djuê ana K’Ho ti kdriêk Lạc Dương, êpul tông cing mơ̆ng sang hră gưl 3 Knŭk kna čiêm rông čar Lâm Đồng, Wăl hiu čhưn ênguê Làng Nấm Đà Lạt leh anăn dŭm êpul bruă, phung ngă bruă hiu čhưn ênguê dŭm ƀuôn prŏng, čar msĕ si: ƀuôn prŏng Hồ Chí Minh, Bà Rịa Vũng Tàu, Đồng Nai, Bình Thuận, Khánh Hòa, Ninh Thuận leh anăn Nghệ An.  Ti nei, anôk mkŏ mjing leh anăn klei bhiăn bi êmuh leh anăn bi kuôl ung mô̆ mnuih K’Ho dưi lŏ wĭt mkŏ mjing, hlăm anăn mâo klei bhiăn yuôm bhăn jing kbhĭr prôč mnŭ, klă sĭt hưn mdah hlâo êkei mniê jing ung mô̆, dua nah gŏ sang dưi bi êrô êbat. Dĭm klei bhiăn anei dưi ngă hlăm mlam.

H Zawut pô mblang