VOV4.Êđê- Leh sa wưng mdei lu hdră bruă kñăm gang mkhư̆ klei ruă Covid 19, Anôk bruă sang čư̆ êa čar Lâm Đồng ba mdah leh hră m’ả dưi brei dŭm hdră bruă lŏ wĭt ngă bruă msĕ aguah tlam mŏng 2h tlam hruê 27/5. Hluê anăn, dŭm bruă msĕ si khăt ƀŭk, bi msiam, čhĭ mnơ̆ng ƀơ̆ng djiêu êlan lehanăn dŭm êpul hgŭm mjuăt ktang asei mlei lŏ wĭt ngă bruă mŏng 2h tlam hruê 27/5. Hlăk êjai anăn, dŭm anôk hlăp mbul, ƀar, karaoke, anôk kdŏ mmuñ mlam, hlăp điện tử, sang mnia mlam, massage, anôk mdah phim rup, dŭm hdră kdŏ mmuñ lehanăn dŭm klei hlăp lêñ mkăn ti wăl tač mnga, ênao êa, war mnga, dŭm klei bi lông mjuăt asei mlei ăt mdei ngă bruă truh kơ hbĭl mâo klei hưn mthâo mrâo. Ară anei Lâm Đồng dôk hluê ngă hdră bi ktlah 209 čô mnuih mrâo wĭt mŏng krĭng mâo klei ruă, hlăm anăn mâo 10 čô dôk bi ktlah ti anôk bruă mdrao mgŭn, 127 čô bi ktlah mklin sa anôk lehanăn 72 čô dôk bi ktlah ti sang. Aguah hruê 27/5, lŏ mâo 52 čô amâo ƀuh ôh kman klei ruă Covid 19 leh dŭm gưl ksiêm dlăng./.

                                                    Pô mblang: H’Nêč Êñuôl