VOV4.Êđê- Hruê 20-7, čar Lâm Đồng lŏ dơ̆ng mâo thiăm 2 čô ruă Covid-19 jing phung mgăt êdeh dŭ mdiăng mnơ̆ng dhơ̆ng mlir čar. Mđĭ ênoh mnuih ruă hlăm čar điư truh 20 čô. Phung ruă Covid-19 tal 19 leh anăn 20 ti čar Lâm Đồng jing mnuih ruă mrô 58038 leh anăn 58235, jing phung mgăt êdeh dŭ mdiăng mnơ̆ng dhơ̆ng mlir čar.

Kyua phung bi tuôm giăm hŏng 2 čô ruă mrâo anei mâo ti dŭm kdriêk Đơn Dương, Đức Trọng, Lâm Hà, Di Linh, Bảo Lâm leh anăn Bảo Lộc, Anôk bruă djŏ tuôm čar Lâm Đồng ba nao leh êpul mđĭ ktang bruă ksiêm dlăng, bi ktlah hjăn, ksiêm mkă leh anăn ktuê dlăng klei ruă. Mơ̆ng mmăt hruê 19-7 truh aguah 20-7, dŭm êpul anei mă leh 53 čô F1 leh anăn 187 čô F2. Knơ̆ng bruă mdrao mgŭn čar Lâm Đồng ăt mâo leh 2 hră mtrŭn mjêč čiăng hiu duah phung djŏ tuôm kơ mnuih ruă Covid-19.

Pô mblang: H’Zawut Ƀuôn Yă