VOV4.Êđê- Tĭng truh aguah hruê 8/7, čar Lâm Đồng bi mklă lŏ mâo 3 čô djŏ kman klei ruă, mđĭ ênoh mnuih ruă Covid 19 mơ̆ng čar anei truh 9 čô. Êngao kơ 6 čô djŏ klei ruă Covid 19 dưi hmao ƀuh êlâo kơnăn ti kdriêk Dă Teh, anôk mrâo bluh mâo klei ruă hŏng 3 čô ruă Covid 19 anei hlăk dôk hdĭp lehanăn mă bruă ti kdriêk Đơn Dương, dưi bi mklă djŏ kman Sar CoV2 leh nao kơ Sang êa drao prŏng čar Lâm Đồng ksiêm dlăng kman. Klă klơ̆ng, hlăm hruê 7/7, jih 3 čô anei đĭ êdeh ôtô pô mơ̆ng kdriêk Đơn Dương nao kơ Sang êa drao prŏng čar Lâm Đồng (ti ƀuôn prŏng Đà Lạt) ksiêm dlăng kman klei ruă Covid 19 lehanăn boh tŭ djŏ kman.

Lehanăn, Anôk bruă ksiêm dlăng klei ruă tưp čar Lâm Đồng mă leh mta ksiêm dlăng hŏng kdrăp RT-PCR lehanăn boh tŭ ăt djŏ kman Sar CoV2 hlăm mmăt hruê 7/7. Leh hmao ƀuh lŏ mâo mnuih ruă Covid 19, hlăm mlam hruê 7/7, Knơ̆ng bruă mdrao mgŭn čar Lâm Đồng mtrŭn leh hră m’ar mjêč tui duah mnuih djŏ tuôm, tuôm bi mtuôm, mbĭt anăn pŏk hdră tui ksiêm. Truh aguah hruê 8/7, êpul djŏ tuôm hmao ƀuh, bi ktlah leh 85 čô jing F1 lehanăn 265 čô jing F2./.

                                                    Pô mblang: H’Nêč Êñuôl