VOV4.Êđê - Tlam hruê 5/7, čar Lâm Đồng lŏ mâo sa čô djŏ kman Sar CoV2. Anei jing mnuih ruă djŏ tuôm kơ pô ruă tal êlâo mơ̆ng čar. Pô ruă mrâo anei jing T.X.C. (56 thŭn), hdĭp djiêu sang pô ruă mrô 17.951 (ti alŭ Phú Hòa, să Mỹ Đức, kdriêk Dă Teh, čar Lâm Đồng), mnuih mrâo wĭt mơ̆ng Hóc Môn, ƀuôn prŏng Hồ Chí Minh.

C jing sa hlăm dŭm čô F1 kyua anăn êlâo kơnăn dưi ba bi ktlah, ksiêm dlăng klei suaih pral lehanăn mă mta nao ksiêm dlăng brei ƀuh djŏ kman klei ruă. Leh mâo bi mklă lŏ mâo mnuih ruă Covid 19, anôk bruă mdrao mgŭn čar Lâm Đồng ba leh T.X.C mơ̆ng anôk bi ktlah mklin sa anôk ba kơ anôk dŏng mdrao bi ktlah ti kdriêk Dă Teh. Snăn, truh kơ ară anei, čar Lâm Đồng mâo leh 6 čô ruă Covid 19. Ară anei, hdră tui ksiêm mnuih djŏ tuôm hŏng pô ruă dôk mâo čar Lâm Đồng pŏk ngă./.

H Nêč pô mblang