VOV4.Êđê- Aguah mbruê, čar Lâm Đồng lŏ hmao ƀuh sa čô mâo klei ruă tưp Covid-19, mđĭ ênoh mnuih ruă ti čar Lâm Đồng truh kơ 13 čô, mnuih ruă mrâo anei jing N.V.D (31 thŭn, ngă bruă mgăt êdeh) mdiăng mnơ̆ng dhơ̆ng mơ̆ng kban mrô 14, să Quảng Lập, kdriêk Đơn Dương (čar Lâm Đồng) nao kơ anôk mnia mblei ti ƀuôn prŏng Thủ Đức lehanăn lŏ mklăk wĭt hŏng anăn.

Tui si klei hưn mdah mơ̆ng pô ruă anei, 2 mlan hŏng anei, ñu amâo wĭt ôh hlăm sang jưh ti kdriêk Đức Trọng, čar Lâm Đồng, knŏng tuôm jĕ giăm mă hŏng sa čô čhĭ mnia, blei mnơ̆ng ƀơ̆ng lehanăn huă pĭt hlăm êdeh, mnei hgei ti anôk blei êa pui. Tuôm mjưh blei kpŭng ƀơ̆ng ti djiêu êlan čar Đồng nai ƀiădah amâo lŏ hdơr ôh anôk anăn. Djŏ tuôm hŏng pô ruă anei, êpul bruă mdrao mgŭn ngă leh bruă tui duah 4 čô F1 lehanăn 16 čô F2, jih jang dŭm čô anei hlăm klei ksiêm mkă amâo mâo ƀuh kmam ôh. Ară anei, bruă tui duah mnuih tuôm jĕ giăm hŏng pô ruă anei dôk dưi ngă hlăm 3 kdriêk Đức Trọng, Di Linh lehanăn Da Huoai.

Pô mblang: Y-Ƀel Êban