VOV4.Êđê - Aguah mbruê 11/7, čar Lâm Đồng bi klă lŏ mâo sa čô mâo klei ruă tưp Covid-19, mđĭ ênoh mnuih mâo klei ruă tưp ti čar Lâm Đồng truh kơ ară anei jing 11 čô. Mnuih mâo klei ruă tưp Covid-19 ti čar Lâm Đồng jing mnuih ruă mrô 28 êbâo 479, jing sa čô mniê mă bruă ti knơ̆ng bruă ngăn prăk Agribank ti kdriêk Đơn Dương. Djŏ tuôm hŏng mnuih ruă anei, čar Lâm Đồng ngă leh bruă tui duah êbeh 90 čô jing F1 lehanăn 700 čô jing F2. Anôk bruă ksiêm dlăng klei ruă tưp čar Lâm Đồng lŏ dôk hrăm mbĭt hŏng dŭm kdriêk Đơn Dương, Đức Trọng lehanăn ƀuôn prŏng Đà Lạt lŏ tui duah, čuăl krĭng, ksiêm mkă kman.

Êlâo kơ anăn, čiăng rơ̆ng mâo klei jăk hlăm bruă gang mkhư̆ klei ruă tưp. Čar Lâm Đồng ngă leh bruă bi kbưi yang ƀuôn tui si hdră mtrŭn mrô 16 mơ̆ng khua knŭk kna. Dŭm alŭ ngă klei bi kbưi yang ƀuôn jing alŭ Tân Lập, să Lạc Lâm lehanăn wăl krah Thanh Mỹ, kdriêk Đơn Dương, hŏng hruê ngă klei bi kbưi ƀiă êdi 14 hruê, mơ̆ng 12 mmông mlam hruê 11/7 truh kơ mâo klei hâo hưn mrâo.

Y Ƀel pô mblang