VOV4.Êđê - Aguah hruê 25/5, Khua knơ̆ng bruă mdrao mgŭn čar Lâm Đồng Nguyễn Đức Thuận brei thâo, jih 120 mta ksiêm mkă dlăng djŏ tuôm kơ pô ruă mrô 3141 amâo ƀuh ôh kman Sar CoV 2 leh gưl ksiêm dlăng tal 3. Tĭng truh kơ aguah hruê 25/5, čar Lâm Đồng bi ktlah leh 355 čô mnuih, hlăm anăn ti anôk bruă mdrao mgŭn mâo 21 čô, ti krĭng bi ktlah mklin sa anôk mâo 259 čô lehanăn bi ktlah ti sang 75 čô. Djŏ tuôm kơ pô ruă Covid 19 mrô 3141 mơ̆ng Bắc Ninh tuôm nao hiu čhưn kơ Đà Lạt mơ̆ng htuê 2 – 5/5. Lâm Đồng tui duah leh 776 čô mnuih. Ară anei dôk bi ktlah 152 čô. Boh nik, mơ̆ng hruê 23 -25/5 mâo leh 249 mta ksiêm dlăng truh 3 blư̆ amâo ƀuh ôh kman Sar CoV2. Phung bi ktlah mklin sa anôk mâo leh boh tŭ 3 blư̆ ksiêm dlăng amâo ƀuh kman Sar CoV2 dưi jao klei bi mklă ruê̆ leh hdră bi ktlah mklin sa anôk./.

H Nêč pô mblang