VOV4.Êđê - Aguah hruê 7/5, Anôk bruă ksiêm dlăng klei ruă tưp čar Lâm Đồng brei thâo: Kluôm čar mâo 8.347 čô mnuih dưi tlŏ vaccine gang mkhư̆ Covid 19 aruăt tal 1 mâo anôk bruă AstraZeneca mkra mjing. Hdră tlŏ mgang dưi rơ̆ng kjăp klei êđăp ênang, êgao hdră kčah mâo mtrŭn leh. Hluê si hdră kah mbha mơ̆ng Phŭn bruă mdrao mgŭn, čar Lâm Đồng mâo leh Phŭn bruă mdrao mgŭn kah mbha 7.100 hnơ̆ng vaccine kơ êpul nao hlăm hdră gang mkhư̆ klei ruă tal êlâo. Wưng tlŏ vaccine dưi mkŏ mjing mơ̆ng hruê 23/4 truh kơ hruê 5/5, anôk bruă mdrao mgŭn Lâm Đồng mkŏ mjing leh 53 anôk tlŏ mgang ti Anôk bruă ksiêm dlăng klei ruă tưp čar, 2 boh sang êa drao prŏng čar, Sang êa drao Hoàn Mỹ Đà Lạt, 12 anôk bruă mdrao mgŭn krĭng wăl, anôk bruă kahan ksiêm čar. Mơ̆ng hdră ksiêm dlăng leh tlŏ mâo 1.046 čô mao klei bi kdơ̆ng hŏng vaccine lehanăn 1 čô mâo klei bi kdơ̆ng ktrŏ mâo msir mghaih leh./.

H’Nêč pô mblang