VOV4.Êđê - Tĭng truh kơ 9 mmông hruê 23/5, čar Lâm Đồng mâo êbeh 281.000 čô mnuih nao mplĕ hră ruah khua, mâo truh kơ 30% čô mnuih mplĕ hră hlăm čar. Leh bi ruê̆ klei bhiăn k’kuh kơ hla čhiăm gru, jih jang 1.110 anôk ruah khua ti čar Lâm Đồng nao kơ bruă mplĕ hră ruah pô bi ala Quốc Hội gưl 15 lehanăn HĐND dŭm gưl wưng thŭn 2021-2026, leh 2 mmông êgao, mâo êbeh 281.000 čô mplĕ hră nao ruah khua, truh kơ 30% ênoh mnuih mplĕ hră kluôm čar. Hlăm dŭm anôk ruah khua, bruă ruah khua dưi nao djŏ hdră êlan lehanăn tui ngă jăk hdră 5 klei mtă kơ bruă gang mkhư̆ klei ruă tưp Covid-19.

Ti anôk ruah khua mrô 5, wăl krah Lạc Dương, kdriêk Lạc Dương, čar Lâm Đồng, phung mplĕ hră jing mnuih K’Ho hur har nao mplĕ hră mơ̆ng phŭn kčưm. Pô mplĕ hră Liêng Hót Ha Tuyên, 60 thŭn, ti ƀuôn Đăng Gia Dềt B, wăl krah Lạc Dương leh ngă klei dưi jing sa čô mnuih ƀuôn sang, hơ̆k mơak lač: “Dlăng kơ hră anăn phŭng mgơ̆ng asei, kâo ksiêm dlăng klă čiăng mâo klei ruah djŏ, čuăn ruah kơ mnuih pô mâo klei đăo knang, hmăng hmưi mnuih pô čuăn ruah mâo klei knhâo, klei thâo đru kơ mnuih ƀuôn sang, mă bruă kyua Đảng, Kyua ala čar, kyua mnuih ƀuôn sang! Anăn jing klei kâo hmăng hmưi”