VOV4.Êđê - Bruă sang čư̆ êa čar Lâm Đồng mrâo mâo hdră mtrŭn mjêč brei mdei êjai bruă mă prăk 2 anôk kăp mă prăk tăk êlan klông čiăng đru kơ bruă gang mkhư̆ klei ruă tưp Covid-19. Tui hluê anăn, Bruă sang čư̆ êa mtă kơ knơ̆ng bruă TNHH Hùng Phát mdei mă prăk tăk ti anôk mă prăk tăk Định An, kdriêk Đức Trọng mơ̆ng 12 mmông hruê anei truh kơ 10 mmông mlan hruê 1/8. Hlăm hruê mmông mdei mă prăk tăk srăng dưi lŏ bi mbŏ hlăm hruê mmông mă prăk tăk ti êlan dơ̆ng pral Liên Khương - kdrŭn čư̆ Preen. Mbĭt hŏng anăn, čiăng đru kơ mnuih ƀuôn sang hlăm alŭ wăl čar Lâm Đồng hlăm bruă êrô êbat, mnia mblei, mâo klei găl ba mkăp dŭm boh mnga bruă lŏ hma kơ dŭm alŭ wăl dôk ngă klei bi kbưi yang ƀuôn gŏng hdră mtrŭn mrô 16 mơ̆ng khua knŭk kna, boh nĭk jing ƀuôn prŏng Hồ Chí Minh, bruă sang čư̆ êa čar Lâm Đồng mâo leh klei akâo kơ phŭn bruă êlan klông Việt Nam dưi ksiêm dlăng lehanăn gĭt gai kơ dŭm čô duh bi liê ti anôk mă prăk tăk să Liên Đầm, kdriêk Di Linh mdei hĕ êjai bruă mă prăk tăk ti anôk anei.

Y Bel pô mblang