VOV4.Êđê -   Hruê 5-4, Knơ̆ng bruă mdrao mgŭn Lâm Đồng gĭt gai Anôk bruă ktuê dlăng klei ruă tưp čar, anôk bruă mdrao mgŭn dŭm kdriêk, ƀuôn prŏng leh anăn dŭm anôk ksiêm mkă mdrao mgŭn hlăm kluôm čar mđĭ ktang bruă gang mkhư̆ klei ruă jơ̆ng kngan ƀăng êgei. Hluê si Anôk bruă ksiêm dlăng klei ruă tưp Lâm Đồng, mơ̆ng akŏ thŭn 2021 truh ară anei, kluôm čar mâo 149 ênoh mnuih ruă jơ̆ng kngan ƀăng êgei, đĭ 109 ênoh mnuih mkă hŏng wưng anei thŭn dih. Hluê si klei gĭt gai mơ̆ng Anôk bruă ksiêm mkă, mdrao mgŭn - Phŭn bruă mdrao mgŭn kơ bruă mđĭ hdră mdrao mgŭn klei ruă jơ̆ng kngan ƀăng êgei, čiăng hmao ksiêm dlăng klei ruă jơ̆ng kngan ƀăng êgei, amâo brei tưp lar hlăm êpul êya, Knơ̆ng bruă mdrao mgŭn čar mtă kơ Anôk bruă ksiêm mkă klei ruă tưp čar mkŏ mjing hdră kčah, gang mkhư̆ klei ruă jơ̆ng kngan ƀăng êgei ti alŭ wăl leh anăn mjêč pŏk ngă hdră kčah.

H’Zawut pô mblang