VOV4.Êđê - Pô mgăt êdeh mâo klei ruă Covid 19 jing N.M.T 33 thŭn, dôk ti alŭ mrô 5, să Đinh Trang Thượng, kdriêk Di Linh, jing mnuih ruă mrô 41056 lehanăn jing mnuih ruă tal 15 hlăm čar Lâm Đồng. Tui si klei mkă dlăng klei ruă ñu dôk ti knơ̆ng bruă Thiên Anh, kdriêk čar mrô 12, ƀuôn prŏng Hồ Chí Minh. Hlăm brô 2h aguah hrue 12/7 ñu đĭ êdeh p’phŭt wĭt kơ Di Linh. Leh truh kơ anôk gak răng ti kčŭn čư̆ Mtei, hlăk kdriêk Dă Huai, čar Lâm Đồng, ñu hưn amâo mâo sĭt ôh kơ klei suaih pral ñu, ñu luar lač wĭt wăl krah Madaguoi, kdriêk Da Huai snăn dưi brei nao.

Hrue 15/7, ñu đĭ êdeh p’phŭt mơ̆ng sang ñu pô nao kơ sang êa drao ƀuôn hgŭm Blao, ti ƀuôn prŏng Bảo Lộc čiăng test pral klei ruă Covid 19, snăn boh mơ̆ng dua blư̆ test jing ñu mâo kman sơăi. Leh kơ anăn ñu ba mkă dlăng hlue hŏng RT-PCR ti sang êa drao prŏng 2 Lâm Đồng hlŏng bi klă ñu mâo kman klei ruă anei. Tui si Nguyễn Đức Thuận, Khua knơ̆ng bruă mdrao mgŭn čar Lâm Đồng, dhar bruă mdrao mgŭn hlăk pral hgŭm hŏng djăp êpul êya tui duah jih jang 5 čô F1 lehanăn 9 čô F2 bi tuôm giăm hŏng mnuih ruă. Jih jang phung anei mkă dlăng leh snăn amâo mâo ƀuh kman ôh. Ară anei bruă tui duah, ngă klei bi ktlah lehanăn ksiêm dlăng klei ruă tưp djŏ tuôm hŏng mnuih ruă hlăk mâo dŭm dhar bruă djŏ tuôm ti Lâm Đồng ngă hŏng jih ai tiê./.

Y Khem pô mblang