VOV4.Êđê - Hruê 16/7, Anôk bruă sang čư̆ êa čar Lâm Đồng mâo leh hră m’ar mjêč kơ bruă lŏ dơ̆ng hluê ngă pral, kjăp dŭm hdră msir gang mkhư̆ klei ruă Covid 19 mŭt hlăm alŭ wăl čar. Čih yap mâo 4 čô ruă Covid 19 jing phung mgăt êdeh, phung đru pŭ mnơ̆ng dhơ̆ng êran ktuê êlan ƀuôn prŏng Hồ Chí Minh – Lâm Đồng lehanăn mklăk wĭt hŏng anăn, Anôk bruă sang čư̆ êa čar Lâm Đồng jao kơ Knơ̆ng bruă Êlan klông dŭ mdiăng gĭt gai, tŭ đua klam lehanăn pral bi hgŭm hŏng Anôk bruă sang čư̆ êa dŭm kdriêk, ƀuôn prŏng hlăm čar čih mkra hdră ngă bruă klă klơ̆ng kñăm mđĭ hdră kriê dlăng phung mgăt êdeh, phung đru pŭ mnơ̆ng dhơ̆ng ktuê êlan kbưi kreh mŭt kbiă hlăm čar.

Mbĭt anăn, Anôk bruă sang čư̆ êa čar mtă kơ Knơ̆ng bruă êlan klông dŭ mdiăng hưn mthâo hŏng anôk bruă dŭ mdiăng mnơ̆ng dhơ̆ng hluê ngă hdră ksiêm dlăng kman SARS-CoV-2 kơ phung mgăt êdeh, phung đru pŭ mnơ̆ng dhơ̆ng 3 hruê/blư̆. Tơdah phung mgăt êdeh, phung đru pŭ mnơ̆ng dhơ̆ng amâo mâo kman Sar CoV2 srăng dưi găn dŭm anôk ksiêm dlăng hdră gang mkhư̆ Covid 19 mơ̆ng 0h hruê 18/7. Anôk bruă sang čư̆ êa čar Lâm Đồng ăt mtă kơ Knơ̆ng bruă Êlan klông dŭ mdiăng čar mjêč bi klin, čih anăn phung mgăt êdeh, phung đru pŭ mnơ̆ng dhơ̆ng ti alŭ wăl čar čiăng čih mkra hdră kčah pral tlŏ mgang vaccine kơ êpul mnuih anei./.

H Nêč pô mblang