VOV4.Êđê -  Hruê mbruê 19/4, ti sang hră Đại học Đà Lạt, mâo leh klei bi trông dua ala čar Việt Nam - Lào ti čar Lâm Đông, knơ̆ng bruă hŏng tač êngao, bruă Đoàn čar Lâm Đồng lehanăn sang hră Đại học Đà Lạt mkŏ mjing leh knăm Bunpimay mơ̆ng dŭm djuê ana ti ala čar Lào lehanăn knăm đru dlăng ba mơ̆ng 21 gŏ sang ti čar Lâm Đồng hŏng 22 čô Sinh Viên Lào dôk hriăm ti sang hră Đaị Học Đà Lạt. Nao hgŭm hlăm knăm anăn mâo Vănxay Saysena - k’iăng khua pô bi ala Lào ti ƀuôn prŏng Hồ Chí Minh lehanăn dŭm knuă druh, phung mă bruă ti sang pô bi ala Lào.

Bruă ngă anei čiăng bi lar klei bi mguôp lehanăn hyuă kjăp klei mjĕ mgiăm mnuih ƀuôn sang 2 ala čar Việt Nam - Lào ăt msĕ si čar Lâm Đông hŏng 2 čar Champasak lehanăn Bolykhamxay ti ala čar Lào. Mbĭt hŏng anăn ngă klei găl kơ dŭm čô Sinh Viên Lào dôk hriăm ti sang hră Đại Học Đà Lạt dưi tŭ drông knăm thŭn mrâo knhuah gru djuê ana pô mơ̆ng dŭm djuê ana ti ala čar Lào. Knăm thŭn mrâo Bunpimay jing knăm mâo lu klei khăp lehanăn klei bi đru, mơ̆ng anăn đru kơ dŭm čô Sinh viên Lào dưi mâo mông găl ksiêm dlăng, ksiêm duah dŭm dhar kreh mơ̆ng mnuih Việt Nam.

H Zawut pô mblang