VOV4.Êđê- Tlam mbruê 2/8, bruă Đảng čar Lâm Đồng mâo leh hdră mtrŭn lŏ mđĭ hĭn dŭm hdră êlan gang mkhư̆ klei ruă tưp Covid-19 hlăm alŭ wăl. Hlăm anăn, mtă kơ mnuih ƀuôn sang amâo kbiă hlăm pưk sang lehanăn bi hrŏ êdeh êdâo mơ̆ng 9 mmông mmăt truh kơ 5 mmông aguah hruê êdei, êngao kơ dŭm bruă mjêč msĕ si klei pui ƀơ̆ng, dŏng mdrao lehanăn dŭm bruă mjêč mkăn. Hră mtrŭn anei srăng dưi dưn yua mơ̆ng hruê 4/8. Hŏng bruă ngă “Răng ngang kjăp, ksŭng nao hmar”, čiăng dưi mkhư̆, amâo dưi brei klei ruă tưp đĭ lar.

Hlăm hdră mtrŭn lač klă, êpul gĭt gai bruă Đảng čar mtă kơ dŭm anôk bruă hlăm čar kñăm kơ ai mă bruă, hruê mmông, ai dưi kơ bruă gang mkhư̆ klei ruă tưp, amâo ngă klei dôk guôn, knang kơ mnuih mkăn, mdua bruă klam kơ pô hlăm anôk siêm dlăng, alŭ wăl, mnuih pô ksiêm dlăng. Amâo dưi brei êgao hnơ̆ng dưi ksiêm dlăng klei ruă tưp. Bruă kñăm ti nei jing gang mkhư̆, ngă bruă mâo klei tŭ dưn, rơ̆ng kjăp, hơĭt bruă mkra mjing, mnia mblei čiăng mâo dŭm ai dưi gang mkhư̆ klei ruă tưp Covid-19 đru kơ mnuih ƀuôn sang.

Pô mblang: Y-Ƀel Êban