VOV4.Êđê- Aguah mbruê 7/7, mâo giăm 14.000 čô hđeh nao hlăm klei bi lông mơ̆ng čar Lâm Đồng ngă leh klei bi lông mta hriăm tal êlâo klei bi lông bi ruê̆ klei hriăm gưl 3. Boh tŭ dưn mơ̆ng klei bi lông mta hriăm tal êlâo mâo klei êđăp ênang, klă mngač lehanăn djŏ hŏng klei bhiăn, amâo mâo ôh hđeh ngă soh hŏng hdră bhiăn klei bi lông.

Čiăng krơ̆ng mâo klei êđăp ênang hlăm klei bi lông, êngao kơ bruă răng ngang klei êđăp ênang, klei jăk hlăm êlan klông, čar Lâm Đồng lŏ mđing mĭn lu kơ dŭm hdră êlan gang mkhư̆ klei ruă tưp Covid-19. Jih jang 39 anôk ngă klei bi lông ngă leh sơăi bruă mdjiê kman, mâo êa doh, kƀu rao kiê kngan, êa mdjiê kman, čhiăm guôm ƀô̆ lehanăn mkă hnơ̆ng hlơr asei kơ phung hđeh, phung knuă druh dlăng klei bi lông. Mbĭt hŏng anăn, hdră êlan đru hlăm klei bi lông ăt dưi ngă jăk mơ̆ng êpul Đoàn viên, hđeh êdam êra hlăm čar.

Pô mblang: Y-Ƀel Êban