VOV4.Êđê - Knơ̆ng bruă mdrao mgŭn čar Lâm Đồng dôk ngă hră mơar kơ hdră êlan tlŏ mgang vaccine gang mkhư̆ klei ruă tưp Covid-19 gưl tal 5 hlăm alŭ wăl, hŏng giăm 36.000 hnơ̆ng vaccine. Hŏng klei kñăm gang mkhư̆ klei ruă tưp Covid-19 hŏng vaccine kơ dŭm êpul mnuih tui si hdră mtrŭn mrô 21 mơ̆ng knŭk kna. hlăm anăn, tlŏ mgang 100% kơ dŭm čô mnuih mâo leh aruăt tlŏ mgang tal 1 lehanăn 95% kơ dŭm êpul mnuih mâo klei hyưt ktang hĭn, leh kơ anăn srăng tlŏ mgang aruăt tal sa kơ mnuih ƀuôn sang hlăm alŭ wăl.

Tui si knơ̆ng bruă mdrao mgŭn čar Lâm Đồng, bruă tlŏ mgang vaccine gưl tal 5 anei mĭn tĭn srăng mkŏ mjing 2 gưl tlŏ lehanăn bi leh êlâo kơ mlan 8/2021. Čiăng klei tlŏ mgang mâo klei êđăp ênang lehanăn rơ̆ng kjăp bruă gang mkhư̆ klei ruă tưp, bruă tlŏ mgang hlăm dŭm anôk bruă dưi bi êdah leh mâo ênŭm klei găl hlăm alŭ wăl, hlăm anăn mâo: sang êa drao prŏng čar Lâm Đồng, sang êa drao prŏng II čar Lâm Đồng, sang êa drao Hoàn Mỹ Đà Lạt, anôk bruă ksiêm dlăng klei ruă tưp čar Lâm Đồng lehanăn anôk bruă mdrao mgŭn 12 kdriêk, ƀuôn prŏng hlăm čar.

Y Bel pô mblang