VOV4.Êđê- Tlam mbruê, êpul gĭt gai bruă gang mkhư̆ klei ruă tưp čar Lâm Đồng mâo leh klei bi klă mjêč ngă klei bi kbưi yang ƀuôn tui si hră mtrŭn mrô 16 mơ̆ng khua knŭk kna ti 2 să hlăm ƀuôn prŏng Đà Lạt. Tui hluê anăn, mơ̆ng 7 mmông mmăt hruê mbruê 6/8, 2 să jing Xuân Trường lehanăn Trạm Hành ti ƀuôn prŏng Đà Lạt srăng kčưm ngă klei bi kbưi yang ƀuôn tui si hră mtrŭn mrô 16 truh kơ êla mâo klei hâo hưn mrâo. Klei bi mklă ngă klei bi kbưi yang ƀuôn 2 alŭ wăl anei dưi ba ngă hlăm wưng klei ruă tưp Covid-19 dleh dưi ksiêm dlăng.

Êpul gĭt gai bruă gang mkhư̆ klei ruă tưp Covid-19 čar Lâm Đồng jao leh kơ Khua kiă kriê bruă Sang čư̆ êa ƀuôn prŏng Đà Lạt mkŏ mjing bruă anei. Djŏ tuôm hŏng anôk mâo klei ruă tưp mrâo, čar Lâm Đồng mâo leh klei hâo hưn mjêč čiăng tui duah phung tuôm nao hlăm dŭm anôk mâo klei hyưt. Hlăm anăn, êngao kơ 2 să Trạm Hành lehanăn Xuân Trường, lŏ mâo dŭm anôk mkăn msĕ si ƀuôn hgŭm mrô 1, 2, 4, 9 lehanăn 10 hlăm ƀuôn prŏng Đà Lạt. Ară anei, bruă tui duah, čuăl krĭng čiăng dưi mkhư̆ klei ruă tưp, amâo dưi brei klei ruă tưp lar hlăm yang ƀuôn dôk dưi ngă mơ̆ng dŭm anôk bruă djŏ tuôm.

Pô mblang: Y-Ƀel Êban