VOV4.Êđê - Tlam 4-7, Knơ̆ng bruă mdrao mgŭn čar Lâm Đồng brei thâo: pô đing djŏ klei ruă Covid-19 jing pô mgăt êdeh mdiăng mnơ̆ng mơ̆ng Đà Lạt - ƀuôn prŏng Hồ Chí Minh amâo ƀuh ôh kman SARS-CoV-2 tal 1. Pô mgăt êdeh anei leh mdiăng mnơ̆ng mơ̆ng ƀuôn prŏng Hồ Chí Minh nao ti Đà Lạt, truh ti adŭ ksiêm mkă - Anôk bruă ktuê dlăng klei ruă tưp čar Lâm Đồng ksiêm mkă pral SARS-CoV-2 snăn mâo klei tŭ djŏ klei ruă. Leh anăn mtam, Anôk bruă ktuê dlăng klei ruă tưp čar Lâm Đồng mă mta ksiêm mkă hŏng RT-PCR snăn mâo klei tŭ tal 1 amâo ƀuh ôh kman SARS-CoV-2. Snăn yap truh yang hruê mbruê 4-7, Lâm Đồng mâo jih jang 5 čô ruă Covid-19, amâo mâo ôh mnuih ruă mrâo. Ară anei kluôm čar dôk bi ktlah hjăn 4.331 čô, hlăm anăn mâo 12 čô bi ktlah hjăn ti anôk bruă mdrao mgŭn, 287 čô bi ktlah hjăn sa anôk leh anăn êbeh 4 êbâo čô bi ktlah hjăn ti sang.

H Zawut pô mblang