VOV4.Êđê- 4 čar hlăm krĭng lăn dap kngư mâo Gia Lai, Kon Tum, Dak Lak lehanăn Dak Nông hlăk dôk pŏk gưl 2 hdră tlŏ vaccine gang mkhư̆ klei ruă buôr čuh kô̆ kŏng đŏk, ênoh tlŏ mgang mrâo mâo êbeh 80% aruăt tal sa lehanăn êbeh 50% aruăt tal 2, ƀiă hĭn mkă hŏng hnơ̆ng kčah mtrŭn. Hluê si Knơ̆ng ksiêm dlăng kman klei ruă tưp krĭng Lăn dap kngư, truh kơ ară anei, dŭm čar krĭng Lăn dap kngư knŏng mrâo tlŏ vaccine gang mkhư̆ klei ruă buôr čuh kô̆ kŏng đŏk wưng tal 2 lehanăn hnơ̆ng tlŏ aruăt tal sa knŏng mâo êbeh 84%, aruăt tal dua mâo êbeh 50%. Gia Lai jing alŭ wăl mâo hnơ̆ng tlŏ vaccine wưng tal 2 êmưt hĭn knŏng mâo 72% aruăt tal sa lehanăn 5% aruăt tal dua. Hlăk êjai anăn, tơdah djŏ si hdră kčah, dŭm čar hlăk dôk tlŏ vaccine gang mkhư̆ klei ruă buôr čuh kô̆ kŏng đŏk ti wưng tal 3. Knơ̆ng ksiêm dlăng kman klei ruă tưp krĭng Lăn dap kngư lač anei, hnơ̆ng tlŏ êmưt jing kyua alŭ wăl ka mâo klei mđing, kao mâo hdră mtrŭt mjhar, ngă kơ mnuih ƀuôn sang amâo mđing, amâo nao tlŏ, đa mnuih nao mă bruă kbưi ngă kơ hnơ̆ng tlŏ anei êmưt./.

Pô mblang: H’Nêč Êñuôl