VOV4.Êđê- Ti Lăn Dap Kngư, Knăm mơak bi hdơr hruê djiê mtao hùng thŭn anei ăt mâo dŭm alŭ wăl mkŏ mjing kdrưh k’ăm. Ti Lâm Đồng, knăm mơak dưi mkŏ mjing hlăm 2 hruê 20 leh anăn 21/4 (jing hruê 9 leh anăn 10-3 hluê mlan ƀlĕ) ti Sang yang Âu Lạc - Wăl  hiu čhưn ênguê drai Prenn, Đà lạt. Hŏng akŏ “ Sa phŭn agha”, knăm mơak mâo lu bruă ngă yuôm bhăn. Êngao kơ klei bhiăn ngă yang djuê ana, myơr mnơ̆ng, brui mngưi ti Sang yang Trung - Thượng - Hạ leh anăn Sang Yang Amĭ Âu Lạc; lu bruă ngă ăt mkŏ mjing kdrăm ah msĕ si: wăl rang mdah kdŏ mmuiñ djuê ana, hưn mthâo dŭm klei mmuiñ ênhiang djuê ana, bi lông hlăp klei hlăp djuê ana, wăl mrah mnơ̆ng ƀơ̆ng huă tlâo kwar, klei bi lông bi msam hlao mnơ̆ng ngă yang, čŭt mnga, bi msiam mnga myơr ngă yang kơ Pô mphŭn mkŏ mjing ala čar… Boh nik, Knăm hdơr hruê djiê mtao Hùng thŭn anei mâo klei rang mdah bi lông mmuiñ đờn ca tài tử kwar Dhŭng, phung mmuiñ hriê mơ̆ng Anôk bruă dhar kreh kdŏ mmuiñ čar An Giang.

Sang yang Âu Lạc - Wăl  hiu čhưn ênguê drai Prenn

Knơ̆ng bruă dhar kreh, mjuăt asei mlei, hiu čhưn ênguê brei thâo, êpul êya bi mguôp hŏng knơ̆ng bruă sang čư̆ êa ƀuôn prŏng Ƀuôn Ama Thuôt lehanăn dŭm êpul êya djŏ tuôm mkŏ mjing knăm ngă yang kơ mtao Hùng hrue 10/3 thŭn Tân Sửu 2021, hlăm hrue 20 lehanăn 21/4/2021. Ti sang knhuah gru dhar kreh Đình lạc Giao, sang mrô 67, êlan Phan Bội Châu, ƀuôn prŏng Ƀuôn Ama Thuột. knăm ngă yang anei hlăm grăp thŭn hlŏng jing leh hrue kơ tar lăn čar, mơ̆ng djuê ana, jing boh kdrŭt đru mguôp sa kdrêč hlăm klei bi mguôp, mjing leh ai ktang hrăm mbĭt găn klei dleh dlan, mơ̆ng klei bi blah, klei yan adiê ngă, mkŏ mjing lăn čar Viêtj Nam knư̆ hrue knư̆ mdrŏng sah kjăp ktang. Knăm mkŏ mjing klei ngă yang kơ mtao Hùng jing wưng čiăng mđĭ ai jih jang mnuih bi ktưn mă bruă ba wĭt klei tŭ jing, bi leh bruă mđĭ kyar klei duh mkra, ala ƀuôn djŏ hŏng hdră mtrŭn klei bi kƀĭn prŏng Đảng čar tal 17./.