VOV4.Êđê - Ti anăp klei ruă tưp Covid-19 dleh ktuê dlăng ti ƀuôn prŏng Hồ Chí Minh, Phŭn bruă lĭng kahan hmao tiŏ nao leh êpul lĭng kahan, kdrăp mnơ̆ng đru kơ bruă gang mkhư̆ klei ruă tưp. Kdrêč “Lĭng kahan Awa Hồ” hruê anei mâo klei čih lač kơ boh phŭn anei.

Ară anei 9/9 čar, krĭng wăl hlăm Kahan krĭng 7 mâo leh klei ruă tưp, hlăm anăn dleh dưi ksiêm dlăng hĭn jing ƀuôn prŏng Hồ Chí Minh hŏng dŭm êbâo čô ruă hlăm grăp hruê, leh kơnăn truh Bình Dương, Long An, Đồng Nai… Hluê si klei gĭt gai mơ̆ng Phŭn bruă lĭng kahan, Knơ̆ng bruă mdrao mgŭn lĭng kahan lehanăn Kahan krĭng 7 pral bi mlih hdră ba yua sang êa drao lĭng kahan Kwar Ngŏ jing sang êa drao dŏng mdrao mnuih ruă Covid 19 kơ lĭng kahan lehanăn mnuih ƀuôn sang krĭng ƀuôn prŏng Hồ Chí Minh hŏng hnơ̆ng 400 boh jhưng đih lehanăn ba yua leh sang êa drao jing jai mrô 5A. Jih dua sang êa drao anei dôk dŏng mdrao kơ 581 čô ruă, ênoh anei srăng lŏ đĭ hluê si klei mâo mơ̆ng klei ruă tưp ti alŭ wăl. Thiếu tướng, K’iăng nai prŏng, nai prĭn Nguyễn Hồng Sơn, Khua sang êa drao 175 brei thâo, sang êa drao dôk mđĭ klei thâo ksiêm dlăng kman kơ mnuih ruă Covid 19 lehanăn dưi ruah jing sa hlăm dŭm anôk tlŏ mgang kơ jih jang mnuih ƀuôn sang kñăm msưh kdŭn klei ruă tưp, ară anei sang êa drao dôk pŏk ngă hdră anei: “Gưl bluh mâo klei ruă lu mrâo êgao, Sang êa drao 175 hmao ƀuh êbeh 120 čô mâo klei ruă hlăm êpul êya hluê hŏng hdră ksiêm dlăng. Sa čô kahan mơ̆ng Sang êa drao 175 djŏ kman klei ruă anei hlăk hluê ngă bruă klam dôk ksiêm dlăng kman klei ruă. Hmei akâo leh hŏng Knơ̆ng bruă mdrao mgŭn lĭng kahan rơ̆ng kjăp hdră mă bruă, hdră msir mghaih lehanăn rơ̆ng kơ hdră mă bruă mơ̆ng sang êa drao, amâo hmăi truh kơ hdră mă bruă mơ̆ng sang êa drao. Sang êa drao ăt akâo kơ anôk bruă djŏ tuôm mkăp kdrăp masin ksiêm dlăng kman ênuk mrâo hŏng hnơ̆ng ksiêm dlăng 1 êbâo mta hlăm grăp hruê, kñăm rơ̆ng klei dôk čiăng hlăm wưng ară anei.

Đru gang mkhư̆ klei ruă tưp, êpul lĭng kahan lehanăn kahan krĭng 7 mđĭ leh bruă ba nao êdeh hiu ksiêm dlăng kman mbĕ hiu lehanăn kdrăp ksiêm dlăng kman hŏng hnơ̆ng lu. Kahan krĭng 7 pŏk ngă leh 55 anôk bi ktlah kơ phung F1 hŏng êbeh 12 êbâo 500 boh jhưng. Mbĭt anăn mkŏ mjing 68 êpul bi kdơ̆ng pral kñăm gang mkhư̆ klei ruă tưp; 51 êpul hiu tui duah, êbeh 200 êpul ksiêm dlăng kman kơ êbeh 37 êbâo 800 mta, tlŏ kơ êbeh 10 êbâo 900 aruăt vaccine kơ mnuih ƀuôn sang đru msưh kdŭn klei ruă tưp dôk mâo ti ƀuôn prŏng Hồ Chí Minh. Mbĭt hŏng sang êa drao lĭng kahan kwar Ngŏ lehanăn Sang êa drao jing jai mrô 5A thơ̆ng dŏng mdrao mnuih ruă Covid 19 ti ƀuôn prŏng Hồ Chí Minh lehanăn dŭm čar riêng gah. Kahan krĭng 7 hlăk lŏ pŏk ngă sang êa drao jing jai mrô 5B hluê si klei gĭt gai mơ̆ng Phŭn bruă lĭng kahan čiăng mkăp kơ klei čiăng ară anei hlăk klei ruă Covid 19 ti alŭ wăl dôk dleh dưi ksiêm dlăng. Thiếu tướng Võ Văn Tri, K’iăng khua knơ̆ng gĭt gai kahan krĭng 7 brei thâo: “Hmei mprăp pŏk ngă sang êa drao jing jai mrô 5B, dŭm hdră mprăp hmei ngă jih leh. Tơdah mâo asăp mtrŭn brei sang êa drao jing jai 5B ngă bruă lehanăn mâo klei bi mklă mơ̆ng anôk bruă djŏ tuôm hlăm kahan krĭng 4 lehanăn Binh đoàn 16 snăn hmei srăng mprăp hlăm wưng bhiâo hlăm brô 5h srăng pŏk ngă mtam sang êa drao jing jai 5B lehanăn hlăm wang 24h srăng dưi mŭt ngă bruă mtam. Sang êa drao mâo jih jang 150 čô mă bruă klă klơ̆ng, mâo sang êa drao hlăm kahan krĭng lehanăn êpul kahan mrô 4, Binh đoàn 16 srăng tŭ đua klam.

Lĭng kahan ăt gĭt gai dŭm êpul thơ̆ng kơ bruă nao hgŭm tŭ mă, kah mbha 4.611 čô knuă druh, mnuih mă bruă mđĭ hdră đru kơ dŭm alŭ wăl hlăm kahan krĭng 7. Hlăm anăn, ti ƀuôn prŏng Hồ Chí Minh mâo 4.025 čô knuă druh, mnuih mă bruă đru gang mkhư̆ klei ruă tưp. Thượng tướng Vũ Hải Sản, K’iăng khua Phŭn bruă mdrao mgŭn brei thâo, klei ruă tưp hlăk mâo dleh dưi ksiêm dlăng ti ƀuôn prŏng Hồ Chí Minh, Phŭn bruă lĭng kahan ba nao leh êpul, kdrăp mnơ̆ng mơ̆ng anôk kahan krĭng lehanăn jih jang êpul kahan nao mŭt hlăm alŭ wăl kahan krĭng 7, mđing kơ hdră gang mkhư̆ klei ruă tưp lehanăn mprăp kơ hdră mdrơ̆ng, bi mklă anei jing bruă klam yuôm bhăn msĕ si mâo boh klei mjêč lehanăn lông dlăng truh kơ bruă răng mgang klei êđăp ênang. “Srăng mđĭ ênoh kahan kơ kahan krĭng 7, êpul nao krih êa drao mdjiê kman kơ êbeh 20 boh êdeh. Phŭn bruă lĭng kahan jao bruă klam wăt kơ êpul kahan mrô 4, Lĭng kahan êa drao ruă lehanăn kahan krĭng 7 kyua mnuih ƀuôn sang jih hruê mlam 24/24 hluê si klei čiăng mơ̆ng alŭ wăl wăt ƀuôn prŏng Hồ Chí Minh, Đồng Nai, Bình Dương lehanăn dŭm čar. Lĭng kahan ăt mđĭ êpul kahan nao kơ kahan krĭng 7 mâo 270 čô lehanăn dŭm kdrăp mnơ̆ng đru kơ kahan krĭng 7 lehanăn boh nik ti ƀuôn prŏng Hồ Chí Minh.”

Amâo djŏ knŏng đru kơ ƀuôn prŏng Hồ Chí Minh lehanăn dŭm čar dôk mâo klei ruă, êpul lĭng kahan lŏ đru kơ dŭm bruă nah tluôn, đru kơ mnuih ƀuôn sang ti krĭng bi ktlah dul hĭn klei dleh dlan. Dŭm hruê êgao, dŭm êpul êya lĭng kahan đru leh kơ mnuih ƀuôn sang ƀuôn prŏng Hồ Chí Minh êbeh 70 ton djam mtam mtah, boh kroh, êbeh 41 êbâo boh mnŭ, 50 ton braih, dŭm êbâo thŭng ƀung hdang krô lehanăn lu mta mnơ̆ng yua mkăn. Hluê hŏng hdră “Lar bra klei khăp’’, ‘’H’uh mđao lĭng kahan hŏng mnuih ƀuôn sang”, “Anôk čhĭ mnơ̆ng doh”, “braih 0 prăk”, “mnơ̆ng dhơ̆ng 0 prăk” ... dŭm mta mnơ̆ng mơ̆ng kiê kngan phung lĭng kahan truh leh hŏng mnuih ƀuôn sang, bi mđao ai tiê mnuih ƀuôn sang ti krĭng kwang dar, đru hgŭm kngan găn klei dleh dlan, gĭr msưh kdŭn klei ruă tưp./.