VOV4.Êđê - Ơ ƀĭng dôk hmư̆! Ti anăp klei mâo dleh dưi ksiêm dlăng mŏng klei ruă Covid 19 hlăm lu ala čar tar rŏng lăn, ăt msĕ hlăm ala čar, hlăm wưng êgao, dŭm čar mâo mbĭt êlan knông lăn hŏng ala čar riêng gah Campuchia mâo leh lu hdră msir klă sĭt, tŭ dưn, đru msưh kdŭn klei ruă, kriê dlăng kjăp êlan knông lăn. Klei čih ti gŭ anei hưn lač kơ klei anei ti čar An Giang lehanăn Đồng Tháp.

Hluê si Trần Hòa Hợp, Khua anôk bruă sang čư̆ êa kdriêk An Phú, čar An Giang, alŭ wăl kdriêk mâo êlan knông lăn êbeh 40 km, siă knông hŏng kdriêk Angkor Bourei, Bourei Cholsar, Koh Thum hlăm čar Kandal lehanăn Takeo, Ala mtao Campuchia. Ti anăp klei mâo dleh dưi ksiêm dlăng mơ̆ng klei ruă Covid 19, An Phú dưi dlăng jing anôk mjêč kơ boh klei ngă soh hŏng hdră bhiăn knông lăn. Knŏng tĭng mơ̆ng akŏ thŭn truh kơ ară anei, dŭm êpul djŏ tuôm hmao ƀuh êbeh 700 čô mnuih mŭt hlăm ala čar soh hŏng hdră bhiăn.

Hluê ngă mta kñăm amâo lui mnuih ƀuôn sang mŭt hlăm ala čar soh hŏng hdră bhiăn, amâo lui klei ruă tưp lar hlăm êpul êya, ktuê êlan knông lăn mâo nanao êpul êya djŏ tuôm krơ̆ng kjăp bruă ksiêm dlăng êlan jơ̆ng lehanăn êlan êa. Trần Hòa Hợp brei thâo: “Hmei mtrŭt mjhar leh hdră bruă jih jang mnuih ƀuôn sang gang mkhư̆ klei ruă tưp. Mŏng hdră mtrŭt mjhar snăn... mnuih ƀuôn sang ƀuh klei thâo săng, klei đua klam mŏng pô hlăm hdră gang mkhư̆ klei ruă tưp, pral hmao ƀuh, gang mkhư̆, nao hưn hŏng anôk bruă djŏ tuôm phung amâo tuôm ƀuh, boh nik mnuih tlĕ mŭt mơ̆ng Campuchia hlăm alŭ wăl”.

Čiăng gang mkhư̆ klei tlĕ mŭt hlăm ala čar soh hdră bhiăn, mbĭt anăn ngă jăk hdră gang mkhư̆, êngao kơ bruă ksiêk kjăp bruă ksiêm dlăng knông lăn, hlăm wưng giăm anei, kdriêk An Phú mtrŭt mjhar leh bruă jih jang mnuih ƀuôn sang nao hgŭm hlăm hdră gang mkhư̆, mdrơ̆ng hŏng klei ruă Covid 19, “Grăp čô mnuih jing sa čô kahan”, đru kơ anôk bruă sang čư̆ êa alŭ wăl hmao ƀuh mnuih găn êrô ti krĭng knông lăn soh hdră bhiăn, gang mkhư̆ klei ruă Covid 19 hmăi truh kơ êpul êya. Ayŏng Nguyễn Minh Trí, sa čô mnuih ƀuôn sang ti să Vĩnh Hội Đông, kdriêk An Phú brei thâo: “Pô jing mnuih ƀuôn sang brei mâo klei đua klam... Kâo nao hgŭm hlăm êpul hiu suang dlăng mơ̆ng alŭ wăl mâo êbeh leh 1 mlan... čiăng răng mgang kjăp klei suaih pral êpul êya, mnuih ƀuôn sang lehanăn kơ pô mtam”.

Kơ klei mŭt hlăm ala čar soh hŏng hdră bhiăn mơ̆ng Campuchia hlăm Việt Nam găn čar An Giang, huĭ srăng ngă tưp lar klei ruă hlăm čar. Hŏng mta kñăm “Amâo lui mnuih mŭt hlăm ala čar soh hdră bhiăn, amâo mâo ôh klei tưp lar klei ruă hlăm êpul êya”, knuă druh, lĭng kahan ti dŭm anôk gak răng, êpul hiu suang dlăng, ksiêm dlăng 24/24h, kriê dlăng kjăp ƀăng jang knông lăn, dŭm êlan điêt, êlan ktlah nao truh ti krĭng knông lăn... gang mkhư̆ jih klei tlĕ kbiă, mŭt hlăm ala čar soh hŏng hdră bhiăn ti krĭng knông lăn. Ayŏng Trần Minh Chiến, K’iăng khua anôk gĭt gai lĭng kahan să Vĩnh Hội Đông, kdriêk An Phú brei thâo: Hŏng ai tiê hur har, đua klam. Êpul kah mbha 2 êpul, sa êpul nao kơ alŭ wăl Vĩnh Hòa, sa êpul nao đru kơ alŭ wăl Vĩnh Ngươm čiăng rơ̆ng kjăp hdră gang mkhư̆ klei ruă tưp.

Hưn mdah dŭm klei dleh dlan mơ̆ng êpul nao hiu suang dlăng, Đại úy Châu Ône, K’iăng khua anôk gĭt gai kđông kahan răng mgang knông lăn Vĩnh Hội Đông, Lĭng kahan răng mgang knông lăn čar An Giang brei thâo: “Adiê mmăt ăt hmăi truh kơ klei ksiêm dlăng mơ̆ng êpul nao suang dlăng... tal dua jing tuôm hŏng adiê hjan angĭn êbŭ ăt dleh dlan mơh. Ƀiădah hŏng klei gĭr mơ̆ng êpul djŏ tuôm... hmei pral mtrŭt mđĭ ai hdơ̆ng găp, mtrŭt mjhar bruă nao hiu suang dlăng ti dŭm krĭng wăl”.

Čar Đồng Tháp mâo êbeh 50 km êlan knông lăn siă knông hŏng čar Pray-veng, ala mtao Campuchia, mâo 2 ƀăng jang knông lăn prŏng jing Thường Phước lehanăn Dinh Bà. Alŭ wăl dleh găn êrô, lu guê gang êa, lu ktuê êlan đ’điêt kyua anăn mjing lu klei jăk găl dôk đuê̆ dăp, đuê̆ kơ êpul djŏ tuôm.

Ayŏng Nguyễn Quốc Triệu, kahan ƀuôn să Thông Bình, kdriêk Tân Hồng lač, êpul kahan ƀuôn hluê ngă jăk bruă klam đru kơ dŭm êpul êya ti anôk gak răng kñăm ksiêm dlăng klei mâo, pral hmao ƀuh lehanăn msir mghaih kjăp dŭm čô mnuih, êpul êya hluê ngă amâo dah đru kơ klei tŭ drông mnuih tlĕ kbiă, mŭt hlăm ala čar soh hŏng hdră bhiăn. “Ksiêm dlăng êdeh êdâo găn êrô, mtă kơ mnuih ƀuôn sang truă čhiăm guôm ƀô̆, rao nanao kiê kngan hŏng kƀu... tơdah mâo mnuih mkăn, mnuih amâo thâo kral srăng ksiêm dlăng êdah êdâo, hră m’ar čiăng gang mkhư̆ klei ruă Covid 19 lehanăn mkhư̆ klei mŭt hlăm ala čar soh hŏng hdră bhiăn”.

Nguyễn Văn Cọp, Khua anôk bruă sang čư̆ êa să Thông Bình, kdriêk Tân Hồng, brei thâo, hlăm wưng giăm anei, bruă sang čư̆ êa alŭ wăl mbĭt hŏng dŭm êpul djŏ tuôm ngă jăk bruă klam gang mkhư̆ klei ruă tưp ti krĭng knông lăn, mtrŭt mđĭ hdră mtô mblang, mtrŭt mjhar mnuih ƀuôn sang hluê ngă dŭm hdră msir gang mkhư̆ klei ruă tưp Covid 19, amâo đru atăt drông mnuih tlĕ kbiă, mŭt hlăm ala čar soh hdră bhiăn, jhŏng nao hưn tơdah ƀuh klei ngă soh hŏng hdră bhiăn knông lăn mâo anôk bruă sang čư̆ êa lehanăn dŭm êpul djŏ tuôm hluê ngă nanao. “Truh kơ ară anei, hdră mtô mblang kơ mnuih ƀuôn sang ti alŭ wăl dưi hluê ngă jăk, mnuih ƀuôn sang mâo klei thâo săng kơ hdră gang mkhư̆ klei ruă tưp. Boh nik, hŏng mnuih mkăn hriê ti alŭ wăl, alŭ wăl pral hmao ƀuh snăn mnuih ƀuôn sang hmao ƀuh ăt pral nao hưn mthâo”.

Dŭm čar mkăn msĕ si Kiên Giang lehanăn Cà Mau ăt pŏk hluê ngă kjăp hdră bi hgŭm hiu suang dlăng, tui ksiêm mnuih găn êrô, čiăng pral hmao ƀuh lehanăn msir mghaih mnuih tlĕ kbiă, mŭt hlăm ala čar soh hŏng hdră bhiăn mâo hlăm wưng anei.

 Khădah klei ruă tưp ară anei ăt dleh dưi ksiêm dlăng, ƀiădah tơ lĭng kahan lehanăn mnuih ƀuôn sang hgŭm kngan snăn djăp klei dleh dlan dưi hgao jih. Hlăm hdră mdrơ̆ng hŏng klei ruă tưp bŏ hŏng dleh dlan msĕ ară anei, klei hgŭm mguôp kjăp sa blư̆ dơ̆ng dưi mđĭ lar. Ti krah adiê mlam mmăt tĭt ti krĭng knông lăn taih kbưi, lĭng kahan lehanăn mnuih ƀuôn sang ăt mâo kjăp sa klei mĭn hlăm sa ktuê êlan gang mkhư̆ klei ruă tưp. Jih jang kyua sa hruê êdei jăk siam, h’ĭt kjăp lehanăn êđăp ênang hĭn./.

H’Nêč pô mblang