VOV4.Êđê- Aguah hrue 1/6, Phŭn bruă lĭng kahan mkŏ mjing leh klei bi kƀĭn trực tuyến kluôm lĭng kahan hlue ngă bruă čuăn, hdră mjêč, mdrơ̆ng hŏng klei ruă tưp Covid 19 hlăm lĭng kahan truh hŏng 187 anôk mkŏ. Gưl bluh đĭ klei ruă tưp tal 4 anei, jih jang djăp êpul êya lĭng kahan dưi lŏ tiŏ nao leh truh 1 êbâo čô lĭng kahan truh kơ anôk mâo klei ruă tưp ti Bắc Ninh, lehanăn Bắc Giang, hlăm anăn mâo êpul hiu mkă dlăng kman, lehanan 43 êpul hiu mă mta mkă dlăng kman. Ăt ti Bắc Ninh, Bắc Giang, phŭn bruă lĭng kahan mâo mkŏ mjing leh 3 boh sang êa drao jing jai pioh mdrao mgŭn mnuih mâo klei ruă tưp covid 19, mâo tŭ jum leh 641 čô mnuih ruă. Mơ̆ng akŏ thŭn truh kơ ară anei, dŭm alŭ wăl lĭng kahan, knơ̆ng kiă kriê bruă lĭng kahan dŭm car, ƀuôn prŏng čŏng ngă mtam djăp hdră mdrơ̆ng hong klei ruă tưp, đru kơ alŭ wăl gang mkhư̆ klei ruă tưp. Phŭn bruă lĭng kahan hlăk mkŏ mjing leh truh 1.906 anôk gang răng hŏng êbeh 12 êbâo čô kahan dôk ksiêm dlăng ti knông lăn, gang mkhư̆ klei ñŭ kma găn knông lăn soh hŏng klei bhiăn. Mơ̆ng akŏ mlan 5 truh kơ ară anei, jih jang dŭm anôk gang răng ti knông lăn mâo ba jao leh kơ alŭ wăl giăm 5 êbâo čô mnuih, hlăm anăn mâo êbeh 1.800 čô mnuih ñŭ kma soh hŏng klei bhiăn, lu jing găn knông lăn Campuchia, lehanăn knông lăn hŏng Trung Quốc./.

Pô mblang: Y-Khem Niê