VOV4.Êđê - Knŏng hlăm wang 1 hruê kăm, ƀuôn prŏng Ƀuôn Ama Thuôt, čar Dak Lak mâo nanao dŭm pluh čô mnuih ruă Covid-19 hlăm êpul êya amâo klă phŭn mtưp, mâo hdră êrô êbat lu anôk. Năng mđing hĭn jing anôk mrâo mâo mnuih ruă ti să Čư̆ Êbur hŏng 17 čô mnuih ruă. Ti anăp klei dleh ktuê dlăng mơ̆ng klei ruă Covid-19, dŭm êpul bruă djŏ tuôm ti ƀuôn prŏng Ƀuôn Ama Thuôt pral čuăl krĭng, hiu duah leh anăn kwang dar dŭm alŭ wăl djŏ tuôm. 

Mơ̆ng tlam 22-8, să Čư̆ Êbur kwang dar leh jih ƀuôn Ea Bông hŏng 10 anôk ktuê dlăng.  Mbĭt anăn test pral kơ mnuih ƀuôn sang. Hruê 23-8 klei tŭ ksiêm mkă hlăm ênoh êbeh 1.500 mta test pral mâo 17 čô djŏ kman SARS –CoV-2.  Leh mâo klei tŭ mtam, hlăm hruê 23-8, Knơ̆ng bruă sang cư̆ êa ƀuôn prŏng Ƀuôn Ama Thuôt brei ba yua Asăp mtrŭn mrô 16 ti să Čư̆ Êbur. Snăn, knŏng hlăm wang 8 hruê, mơ̆ng hruê 16-8 truh 23-8, ƀuôn prŏng Ƀuôn Ama Thuôt   mâo leh 28 čô mnuih ruă Covid-19 ti 4 anôk hlăm êpul êya.

H Zawut pô mblang