VOV4.Êđê - Tlam mbrue (20/10), Anôk bruă ksiêm dlăng klei ruă tưp čar Daklak brei thâo: Hlăm ƀuôn prŏng Ƀuôn Ama Thuôt mrâo lŏ mâo truh 17 čô mnuih test pral djŏ kman klei ruă tưp Covid 19 ti dua anôk jing Ƀuôn hgŭm Tân Tiến, lehanăn Tân Lập. Hlăm 17 čô mnuih tưp djŏ mrâo anei, mâo 4 čô ti êlan Hồ Tùng Mậu, ƀuôn hgŭm Tân Tiến mkă dlăng PCR mâo kman.

Leh ƀuh mnuih mâo kman êpul bruă djŏ tuôm nga mtam klei kwang dar, mkŏ mjing bruă mkă dlăng kman kơ êbeh 1 êbâo čô mnuih ti alŭ anôk dôk mrô 3 ƀuôn hgŭm Tân Tiến lehanăn lŏ ƀuh sa čô mnuih mâo kman. Êngao anăn, hlăm aguah hrue mbrue, sa kruôp ung mô̆ hlăk dôk hdĭp hlăm sang ktuê êlan điêt mrô 129 Ama Khê, ƀuôn hgŭm Tân Lập ƀuh hlăm asei mlei êmăn êmik snăn nao mkă dlăng kơ sang êa drao êngao knŭk kna. Ti anei, dua čô mâo mkă dlăng kman pral jing mâo kman. Djŏ tuôm hŏng klei ruă tưp ti čar Daklak, hlăm hrue mbrue, alŭ wăl lŏ mâo truh 35 čô mnuih mâo kman hŏng Covid 19 ti dŭm kdriêk, wăl krah hlăm čar./.

Y Khem pô mblang