VOV4.Êđê - Aguah hruê 29/7, AstraZeneca ba leh kơ ƀuôn prŏng Hồ Chí Minh 659.900 hnơ̆ng vaccine COVID-19. Anei jing gưl ba jao vaccine tal 6 hluê si klei kuôl kă blei plah wah AstraZeneca Việt Nam lehanăn Anôk bruă mguôp hnư vaccine Việt Nam (VNVC), hŏng klei đru mơ̆ng Phŭn bruă mdrao mgŭn. Ară anei, klei kuôl kă anei ba wĭt leh kơ Việt Nam giăm 3,8 êklăk hnơ̆ng, bi knar hŏng hlăm brô 41% hnơ̆ng vaccine COVID-19 mơ̆ng AstraZeneca hlăm ala čar. Jih jang mâo giăm 9,3 êklăk hnơ̆ng vaccine COVID-19 mơ̆ng AstraZeneca dưi ba ti Việt Nam. Nitin Kapoor, Khua kiă kriê hlŏng klam Khua anôk bruă, AstraZeneca Việt Nam lehanăn dŭm wăl anôk krĭng Asi mrâo đĭ brei thâo, srăng lŏ bi hgŭm hŏng Phŭn bruă mdrao mgŭn, WHO, UNICEF lehanăn VNVC čiăng ba vaccine kơ Việt Nam hŏng sa hdră pral lehanăn êđăp ênang, čiăng kơ mnuih ƀuôn sang hnưm dưi lŏ wĭt hŏng klei hdĭp aguah tlam lehanăn kuh kŭm ênŭm ênap hŏng gŏ sang./.

H Nêč pô mblang