VOV4.Êđê - Lač kơ boh tŭ dưn hlăm klei ksiêm dlăng, čuăl mkă 3 mta dliê hlăm hdră mtrŭn 100/NQ - HĐND hruê 7/12/2017 (wưng păn bruă 2019-2020) mâo klei soh, amâo djŏ hŏng hdră êlan mđĭ kyar bruă duh mkra - ala ƀuôn hlăm čar, bruă sang čư̆ êa čar Gia Lai ba mdah hlăm klei kƀĭn tal 2, êpul gơ̆ng bruă ƀuôn sang čar Gia Lai wưng păn bruă mrâo (2021-2026) ksiêm dlăng, hlăm boh tŭ dưn klei ksiêm dlăng, bi mlih klei čuăl mkă dliê kmrơ̆ng wưng thŭn 2025- 2030. Tui hluê anăn, hŏng klei kluôm ênŭm, čuăl mkă dliê kmrơ̆ng mơ̆ng čar Gia Lai hrŏ 18.000 ha. Năng mđĭng ti nei jing, ênhă lăn dliê pioh mjut mjing kyâo mâo klei akâo bi mbŏ êbeh 32.000 ha lehanăn mă êbeh 44.000 ha akâo bi kbiă mơ̆ng lăn dliê pioh jing lăn ngă bruă mđĭ kyar bruă duh mkra - ala ƀuôn. Dŭm anôk dliê mâo klei akâo kbiă đuĕ mơ̆ng klei čuăl mkă anei jing dŭm čuê dliê dôk hlăm wăl knơ̆ng êa Ia Mơr (kdriêk Čư̆ Prông), knơ̆ng êa Ia Thul (kdriêk Ia Pa lehanăn Krông Pa) lehanăn dŭm bruă amra rŭ mkra mkăn msĕ si phŭn pui kmlă, anôk mkŏ mkra iêu mthưr duh bi liê, wăl hiu čhưn ênguê… leh mâo klei bi mlih, ênhă lăn dliê pioh mjut mjing kyâo hrŏ 47.200 ha./.

Y Ƀel pô mblang