VOV4.Êđê - Klei hâo hưn yang hruê dơ̆ng hruê 31/5 mơ̆ng Phŭn bruă mdrao mgŭn brei thâo, lŏ mâo 68 čô mâo klei ruă Covid 19 hlăm ala čar, knŏng ti Bắc Giang mâo 48 čô, Bắc Ninh 4 čô, Hà Nội 12 čô, Long An 2 čô, Dak Lak 1 čô lehanăn Đà Nẵng 1 čô. Ăt hlăm aguah hruê 31/5, Sang êa drao gưl dlông Huế mkŏ mjing leh Knăm atăt êpul phung nai aê mdrao ba anăp đru kơ čar Bắc Giang mdrơ̆ng hŏng klei ruă Covid 19. Êpul mâo 18 čô knuă druh, mnuih mă bruă mdrao mgŭn jing phung thơ̆ng kơ adŭ dŏng mdrao mjêč, lŏ krŭ wĭt kboh, bi kdơ̆ng hŏng klei djŏ mnơ̆ng ruă. Mbĭt hŏng bruă nao hgŭm dŏng mdrao, ksiêm mkă, tui duah... phung thơ̆ng kơ bruă mơ̆ng Sang êa drao Gưl dlông Huế srăng hưn mdah klei ksiêm hriăm bruă kreh knhâo kñăm kah mbha klei thâo hlăm hdră kriê dlăng lehanăn dŏng mdrao mnuih ruă Covid 19. Êlâo anăn, anôk bruă sang čư̆ êa ƀuôn prŏng Đà Nẵng ăt ba nao 10 čô nai aê mdrao, phung mă bruă mdrao mgŭn đru kơ Bắc Giang hlăm hdră dŏng mdrao, gang mkhư̆ klei ruă Covid 19. K’iăng khua phŭn bruă mdrao mgŭn Nguyễn Trường Sơn brei thâo, phŭn bruă mprăp ba nao 500 čô sinh viên Sang hră Cao đẳng bruă mdrao mgŭn Bạch Mai lehanăn êbeh 400 čô mnuih mă bruă mdrao mgŭn đru kơ Bắc Giang./.

H Nêč pô mblang