VOV4.Êđê - Klei mblah dưi mơ̆ng hruê 2 - 5/8/1964 jing klei ktưn hưn mơ̆ng lu gưl ênuk, lĭng kahan êa. Jing anôk bruă hgŭm hlăm klei tŭ dưi tal êlâo sui hŏng anei 57 thŭn, dŭm gưl ênuk phung knuă druh, lĭng kahan Êpul kahan 170 Krĭng 1 Êpul kahan êa amâo uêñ kơ klei dleh dlan, suăi êmăn, bi hgŭm mkŏ mjing êpul kahan êa amâo mdei đĭ hriê kơ prŏng jing phung kmeh gơ̆ng mâo klei dưi răng mgang plao ksĭ nah Dưr mơ̆ng čar Kwar.

Dŭm hruê anei, khădah yan adiê hmăi mơ̆ng gưl adiê mđiă hlơr lehanăn klei ruă Covid 19, knuă druh, lĭng kahan Hải đội 135,  Lữ đoàn 170 ăt gĭr jih ai tiê hriăm mjuăt kơ hdră kdơ̆ng mblah ti kđông kahan. Kđông kahan dôk ti čar Quảng Ninh, Lữ đoàn 170, hluê ngă bruă klam gang mkhư̆ klei ruă tưp êjai, krơ̆ng kjăp êpul kahan, kdrăp mnơ̆ng mprăp kdơ̆ng mblah êjai. 100% knuă druh, lĭng kahan mơ̆ng Lữ đoàn ăt hluê ngă kjăp hdră gang mkhư̆, mdrơ̆ng hŏng klei ruă tưp, boh nik jing klei kčah mtrŭn “5 Asăp mtă” mơ̆ng Phŭn bruă mdrao mgŭn. Mbĭt hŏng bruă mprăp djăp ênŭm êa drao gŭn, êa rao bi mdjiê kman, krih êa drao, truă čhiăm guôm ƀô̆ lehanăn ksiêm dlăng nanao hnơ̆ng hlơr asei mlei, hmei gĭt gai dŭm anôk bruă, êpul êya gưl nah gŭ kah mbha êpul knuă druh, lĭng kahan dôk gak răng hluê êpul đ’điêt kñăm rơ̆ng hdră bi ktlah êjai hriăm mjuăt. Mơ̆ng kdrŭn mjưh ti kđông kahan anei, mâo leh lu hô̆ pui mơ̆ng Lữ đoàn 170 nao ngă bruă, hluê ngă tŭ dưn bruă klam mâo kčah jao. Mđĭ lar knhuah gru mơ̆ng phung aê ama nao êlâo, phung knuă druh, lĭng kahan mơ̆ng Lữ đoàn hruê anei amâo mdei hriăm mjuăt, bi kjăp klei mĭn hlăm bruă kđi čar, lŏ dơ̆ng hriăm mjuăt mđĭ klei thâo kơ hdră mnêč kdơ̆ng mblah. “Ktưn hưn dưi jing knuă druh, lĭng kahan mơ̆ng êpul êya nao hgŭm kdơ̆ng mblah tŭ dưn hlăm kdrăn mblah tal êlâo”, anăn jing klei mĭn mơ̆ng jih jang phung knuă druh, lĭng kahan Hải đội 135, Lữ đoàn 170.

Thượng úy Trần Văn Cảnh,  khua anôk bruă hỏa lực tàu 354, hải đội 135 brei thâo: Dŭm klei hriăm, knhuah gru yuôm bhăn mơ̆ng aê ama nao êlâo jing sa klei yăl dliê kñăm bi mjuăt hriăm hlăm dŭm mmông bi mjĕ mjuk čiăng mtă mtăn kơ jih jang knuă druh, lĭng kahan brei mđĭ nanao klei thâo, bi leh jih bruă klam mâo kčah jao hlăm ya boh klei bluh mâo. “Jing ênuk gưl dưi hdĭp hlăm klei êđăp ênang lehanăn dưi dưn dŭm boh tŭ dưn kbiă hriê mơ̆ng klei săn asei, klei đru mguôp prŏng prĭn mơ̆ng ai aê ama nao êlâo, boh nik mă bruă ti Lữ đoàn mâo dŭm boh hô̆ pui jing êpul ba akŏ hlăm kdrăn mblah tŭ dưi mơ̆ng (HQNDVN) êpul kahan êa yang ƀuôn Việt Nam, kâo pô ƀuh ktưn hưn lehanăn ƀuh klă mơh klei đua klam mơ̆ng pô.

Thiếu tá Phạm Tố Chinh, Khua hlăm anôk bruă kđi čar Hải đội 135 brei thâo: Dŭm klei hriăm knhuah gru hlăm klei bi blah dưi hruê 2-5/8/1964 mtrŭt mđĭ leh ai, mjing klei đăo knang lehanăn lŏ bi kjăp klei mĭn gĭr ktưn kơ phung knuă druh, lĭng kahan Hải đội hruê anei mprăp tŭ klei săn asei čiăng răng mgang kjăp klei dưi kiă kriê kluôm ênŭm krĭng êa ksĭ, plao ksĭ mơ̆ng Lăn čar. “Čiăng mđĭ lar klei thâo mơ̆ng phung knuă druh, lĭng kahan tal êlâo hĭn jing mjuăt bi hriăm hlăm klei mĭn, thâo săng klă kơ bruă klam, dŭm klei dleh dlan, lông dlăng hlăm klei hluê ngă bruă klam, mơ̆ng anăn bi klă jăk bruă klam mâo kčah jao, mjing klei găl kơ wăl anôk mjuăt bi hriăm čiăng kơ jih diñu dưi mđĭ lar jih klei thâo, ai tiê čŏng pô ngă bruă, tui ksiêm hriăm lehanăn boh nik mâo ai mprăp kơ hdră kdơ̆ng mblah, hriăm mjuăt ti êpul êya, bi trông klei thâo hŏng phung nao êlâo, mđĭ lar jih ai tiê đua klam mơ̆ng pô.

Dŭm thŭn giăm anei, hlăm hdră ngă bruă mơ̆ng Hải đội 135 lŏ mâo lu hô̆ pui kdrăp mrâo. Ksiêm dlăng kjăp hdră mjuăt bi hriăm, mprăp ai bi blah lehanăn rơ̆ng kơ hdră mnêč, jing bruă ngă nanao mơ̆ng phung khua kiă kriê, phung gĭt gai kahan dŭm gưl ti Lữ đoàn 170, kñăm mđing truh kơ mta kñăm kdlưn hĭn: Mnuih lehanăn kdrăp mnơ̆ng yua mprăp nanao čiăng bi leh jih bruă klam mâo kčah jao. Tô Hồng Quân, Khua bruă Đảng Lữ đoàn 170, krĭng 1 kahan êa lač snei: Knuă druh, lĭng kahan Lữ đoàn 170 jhŏng ktang mâo kjăp klei mĭn răng mgang kluôm ênŭm krĭng lăn yuôm bhăn mơ̆ng ala čar: “Hriăm, mă bruă ti sa êpul êyua bruă mâo knhuah gru lĭng kahan ktưn hưn êdi, lữ đoàn ăt mtrŭt mjhar brei jih jang lĭng kahan ba yua raih jih kdrăp mnơ̆ng, mđĭ lar ai tiê găn djăp klei dleh dlan, bi kjăp klei mĭn bruă kđi čar.

Mơ̆ng kdrăn mblah tŭ dưi tal êlâo ênuk đưm êlâo, dŭm ênuk gưl knuă druh, lĭng kahan hruê anei dưi mtrŭt mđĭ ai mbĭt anăn mđĭ lar leh ai ktang čiăng mkŏ mjing sa Lữ đoàn 170 kjăp ktang, djŏ hŏng anăn knăl jing êpul êya djă phao ktuang yang ƀuôn ti krĭng êa ksĭ, plao ksĭ nah Dưr ala čar./.