VOV4.Êđê- Ti anôk bi kƀĭn tal 1, bruă kƀĭn ala gưl 15 dôk mkŏ mjing ti Hà Nội, Khua Dhar bruă mặt trận čar kwar Việt Nam Đỗ Văn Chiến hưn mdah leh Klei hâo hưn bi klin klei blŭ, klei akâo mơ̆ng mnuih ƀuôn sang čiăng. Mbĭt hŏng dŭm boh tŭ dưn yuôm bhăn dưi mâo, mnuih ƀuôn sang kluôm ala mđing  êdi kơ hdră mtrŭn đru kơ mnuih hmăi mơ̆ng klei ruă Covid 19.

Lu mnuih mâo klei sa ai hlăm hdră êlan sa anăn mơ̆ng Đảng dưn yua jih ai ktang klei bi mguôp jih jang djuê ana, krŭ wĭt klei êpa hmao đru rŭ mdơ̆ng lăn čar drei đĭ kyar mdrŏng sah, jăk yâo. Mbĭt hŏng boh tŭ dưn bruă mdrơ̆ng hŏng klei ruă tưp, phung duh mkra, êpul bruă duh mkra mnia mblei, phung ƀuôn sang lŏ dơ̆ng ktuh êyuh hlăm bruă mđĭ kyar klei duh mkra mnia mblei, čiăng kơ bruă duh mkra mâo klei đĭ kyar truh 5,64%, mâo leh jih 3 êpul bruă mâo dăp klei đăo knang hŏng tač êngao, kñăm đru mđĭ k’hưm kơ lăn čar hlăm klei “bi hơĭt” truh kơ “klei jăk kjăp”, mâo klei êđăp ênang bruă kđĭ čar, klei êđăp ênang yang ƀuôn, păn kjăp klei hdĭp mda ala ƀuôn, čiăng kơ phung ƀuôn sang hơĭt nanao. Khua knơ̆ng bruă mặt trận čar kwar gưl dlông Việt Nam Đỗ Văn Chiến lač: Lu mnuih mâo klei mơak leh khua knŭk kna bi ala kơ Đảng, knŭk kna mtrŭt mjhar klei tlŏ vaccine gang mkhư̆ klei ruă tưp hlăm kluôm ala jing prŏng hĭn hlăm hƀuê ênuk, siămdah, mâo lu mnuih ăt adôk đing adôk hyưt kơ klei anei:

“Lu mnuih dôk mâo klei đing, dôk hyưt êjai tar rŏng lăn hlăk hlê hin kƀah vaccine, kơ dŭm klei ƀuăn mơ̆ng anôk mkra mjing amâo mâo kjăp ôh, vaccine mkr amjing hlăm ala čar hlăk ti wưng dôk lông ba yua, snăn drei bi mâo hĕ hdră klă sĭt jing đĭ kyar kjăp, dưi ngă sĭt snăn kơh ênoh tlŏ mgang mgi dih srăng djăp truh 75% ênoh mnuih hlăm kluôm ala msĕ hŏng hdră mơ̆ng Phŭn bruă mdrao mgŭn kčah leh. Tơdah amâo mâo djăp ôh hŏng ênoh kčah anăn, sĭt nik bruă krŭ wĭt klei duh mkra srăng lĕ hlăm klei toh hroh, klei hdĭp mda phung ƀuôn sang srăng tuôm hŏng klei dleh dlan, boh nik hŏng phung ênưih lĕ hlăm klei kpĕ êka, mnuih amâo mâo bruă knuă mă, kyua tuôm hŏng klei bi ktlah, kwang dar mơ̆ng klei ruă tưp covid 19”.

Khua Dhar bruă mặt trận čar kwar Việt Nam Đỗ Văn Chiến hưn mdah leh Klei hâo hưn bi klin klei blŭ, klei akâo mơ̆ng mnuih ƀuôn sang čiăng.

Hŏng ênoh đru 62 êbâo êklai prăk hlue si hdră mtrŭn mrô 42 mơ̆ng knŭk kna kơ hdră đru phung ƀuôn sang tuôm hŏng klei dleh dlan kyua klei ruă tưp covid 19 jing tui hlue wưng, mghaih msir ti anôk mjêč hĭn. Siămdah, mâo lu mnuih bi lač, klei mbha prăk đru kơ phung ƀuôn sang adôk mtŭk mtŭl, amâo mâo klă nik ôh mnuih dưi dưn prăk đru, mơ̆ng anăn mơh hdră bi liê mơ̆ng prăk knŭk kna kñăm pioh đru kơ phung ƀuôn sang, kơ phung duh mkra knŏng mrâo ngă mă ƀiă bhiă đuič, amâo mâo djŏ hŏng klei kčah mtrŭn ôh. Akâo kơ dŭm phŭn dhar bruă, bruă sang čư̆ êa dŭm gưl, dŭm anôk bruă djŏ tuôm mâo klei ksiêm wĭt bi pral, mkă tĭng bi djŏ, mă klei hriăm, hlak mblang klă phŭn agha, bruă klam pioh ngă jăk hĭn klei bi đru hlue hdră mtrŭn mrô 68 mơ̆ng Knŭk kna, kñăm đru phung duh mkra, lehanăn phung ƀuôn sang hŏng klei klă mngač hĭn, djŏ hĭn.

Lu mnuih dôk bư̆ ban, dôk rŭng răng, knŏng adôk mă 5 mlan jih yơh thŭn 2021, ƀiădah dŭm klei gun kpăk, klei amâo mâo djŏ, klei adôk mđĭ mđăl kơ klei bhiăn, kơ hdră êlan mă bruă, tui si hdră mtrŭn mơ̆ng hdră bhiăn knŭk kna adôk nanao mơ̆ng sui ka dưi ruh mgaih, snăn tơdah knŭk kna, bruă kƀĭn ala amâo bi ruh mtlaih mtam ôh klei adôk ka djŏ anăn, snăn jih jang ênoh čuăn kơ bruă duh mkra ala ƀuôn thŭn 2021 amâo srăng dưi bi leh ôh. Êjai dôk găn klei bi ktlah, bi kbưi hlăm yang ƀuôn čiăng kơ jih jang mnuih dưi gang mkhư̆ klei ruă tưp, mâo đa đa phung hđeh amâo lŏ dưi nao sang hră mơar ôh, amâo mâo anôk hlăp mbul jăk ôh, tơdah nanao msĕ djuê anăn srăng hmăi amâo mâo jăk kơ klei mĭn ai tiê phung hđeh, boh nik hŏng phung hđeh hdĭp hlăm ƀuôn prŏng, hlăm sang dôk lu mnuih. Klei anei năng mâo hdră mghaih msir bi djŏ guôp, amâo mâo dưi dlăng hơăi mang ôh.

Phung ƀuôn sang mâo klei akâo kơ phung bi ala bruă kƀĭn ala mâo bruă klam prŏng hĭn, gĭr hĭn ngă bruă hŏng klei kjăp, tŭ jing hlăm hdră ngă bruă, bi sĭt klei ƀuăn leh hŏng phung ƀuôn sang hlăk dôk mtrŭt mjhar klei ruah khua, lŏ gĭr hriăm mjuăt, ksiêm duah mđĭ klei thâo hlăm bruă hĭn, thâo hlăm klei jing pô bi ala, mâo bruă bi hmô jăk, mâo klei jhŏng, klă sĭt jing pô sĭt suôr hŏng phung ƀuôn sang, gĭr mă bruă hŏng jih ai tiê čiăng kơ phung ƀuôn sang mpŭ, mâo bruă klam čiăng kơ phung ƀuôn sang khăp, mâo klei bhiăn kjăp čiăng kơ phung ƀuôn sang mpŭ, knhăk hlăm bruă mâo anôk phung ƀuôn sang knang. Khua knơ̆ng bruă mặt trận car kwar gưl dlông Việt Nam Đỗ Văn Chiến akâo kơ bruă kƀĭn ala lŏ dơ̆ng mlih mrâo hdră mă bruă, mđĭ hnơ̆ng kjăp bruă mkŏ mjing hdră bhiăn, dưi mklă mklơ̆ng dŭm mta bruă yuôm bhăn kơ lăn čar, lehanăn gưl dlông ksiêm dlăng:

“Bruă mkŏ mjing hdră êlan, hdră bhiăn brei mâo klei mđing uêñ kơ klei jing sĭt, mâo hdră êlan kjăp, bi hrŏ tuič hnơ̆ng ya mta klei bhiăn amâo mâo djŏ, kñăm mâo klei bi mlih bi djŏ hŏng knhuah bhiăn hdĭp, čiăng kơ klei bhiăn mđrĭng hŏng klei hdĭp; pral mâo klei bi mlih, thiăm mbŏ kơ klei bhiăn lăn ala; čăng hmăng kơ bruă kƀĭn ala hrăm mbĭt hŏng knŭk kna ruh mgaih djăp mta klei adôk gun kpăk kơ hdră bhiăn čiăng bi mâo klei djŏ guôp sĭt, mtrŭn sa klei bhiăn lông ngă kơ sa anôk bi hmô êlân kơ bi mklă, kñăm đru mgaih djăp mta klei dleh ktrŏ kơ mnuih, kơ klei ngă bruă êjai dôk găn klei ruă tưp prŏng Covid 19 hmăi amâo mâo jăk hŏng klei duh mkra ala ƀuôn. Kyuadah hŏng klei amâo mâo hơĭt ênang anei, lŏ ba yua hĕ hdră êlan, klei bhiăn msĕ si êlâo sĭt nik jing amâo lŏ djŏ ôh hŏng klei dôk čiăng mghaih msir ară anei”.

Ƀri klei anei, Êpul khua kiă kriê Knơ̆ng bruă mặt trận čar kwar gưl dlông Việt Nam iêu mthưr jih jang phung ƀuôn sang, phung bi ala kluôm ala, dŭm êpul êya lehanăn grăp čô mnuih, wăt mnuih ala tač êngao hlăk dôk hdĭp ti Việt Nam brei kjăp ai tiê đăo knang kơ klei kiă kriê klă mngač mơ̆ng Đảng, lăn čar, knŭk kna, khua knŭk kna kơ bruă mdrơ̆ng hŏng klei ruă tưp Covid 19, brei mâo klei thâo bi mguôp, thâo bi đru hdơ̆ng găp, mjing klei bi sa ai, hlue ngă bi djŏ asăp mtrŭn kơ bruă bi ktlah, bi kbưi hlăm yang ƀuôn, tlŏ vaccine gang mkhư̆ klei ruă tưp covid 19, hlue ngă 5 mta klei mtă mơ̆ng Phŭn bruă mdrao mgŭn. Phung ƀuôn sang hlăm kluôm ala bi mguôp sa ai tiê, sĭt nik srăng dưi gang mkhư̆ klei ruă tưp covid 19, ngă tŭ jing hdră mtrŭn klei bi kƀĭn prŏng Đảng kluôm ala gưl 13, bi sĭt klei êpa mhao rŭ mdơ̆ng lăn čar đĭ kyar mdrŏng sah, jăk yâo./.

Pô mblang: Y-Ƀel Êban