VOV4.Êđê- 6 mlan akŏ thŭn 2021, Dak Lak mâo truh 650 klei bi rai dliê leh anăn ksing mmiă lăn dliê soh hŏng hdră bhiăn, mâo mkrah wah klei ngă soh hŏng hdră bhiăn răng mgang dliê hlăm kluôm ala. Anei jing boh klei năng hưn răng, brei ƀuh klei bi rai dliê ti Dak Lak mâo dleh ktuê dlăng. Hluê si klei ksiêm yap mơ̆ng Anôk bruă dliê kmrơ̆ng čar Dak Lak, hlăm 6 mlan akŏ thŭn, kluôm čar mâo 590 klei bi rai dliê leh anăn 60 klei ksĭng mmiă lăn dliê soh hŏng hdră bhiăn, hŏng ênhă dliê leh anăn lăn dliê bi rai mâo 207 ha.

Hlăm anăn, dŭm anôk bruă djŏ tuôm đŭ bi kmhal leh 390 klei, hrui mă giăm 260 m3 kyâo dŭm mta, 252 êdeh êdâo ngă soh, jao kơ knŭk kna giăm 3 êklai prăk. Năng mđing hĭn, mâo truh 70% ênoh klei bi rai dliê hlăm 6 mlan êgao ti Dak Lak jing ti kdriêk Krông Bông, sa anôk mâo klei bi rai dliê ktang mâo dŭm gưl bruă ti čar kƀĭn msir mgaih.

Pô mblang: H’Zawut Ƀuôn Yă