VOV4.Êđê - Khă gơ̆ tuôm hŏng klei dleh dlan kyua hmaĭ mơ̆ng klei ruă Covid-19 ti lu alŭ wăl, klei ruah khua Quốc hội gưl 15 leh anăn bi ala HĐND dŭm gưl wưng tŭn 2021-2026 tŭ jing leh jăk hŏng ênoh phung bi ala nao ruah mâo êbeh 99%, mâo klei kruăk knăl jăk hlăm ai tiê phung bi ala kơ mnuih ƀuôn sang kluôm ala kơ sa klei ruah khua jăk, đua klam leh anăn mbruă. Snăn ya klei hriăm mâo mơ̆ng klei ruah khua anei?

Lŏ dlăng wĭt hdră ruah Quốc hội lehanăn Hội đồng nhân dân mrâo mkŏ mjing, Khua Quốc hội Vương Đình Huệ, Khua Êpul hgŭm ruah khua ala čar mñă klă, hdră ruah khua tal anei dưi mkŏ mjing djŏ hdră bhiăn, mkiêt mkriêm, êđăp ênang lehanăn klă sĭt jing “Hruê m’ak mơ̆ng ala čar”. “Alŭ wăl mâo ênoh mnuih nao ruah lehanăn ƀiă êdi êbeh 98%. Ênoh nao ruah msĕ snăn jing jăk leh, lehkơnăn drei ruah ênŭm leh 500 čô bi ala Quốc hội. Mâo dŭm alŭ wăl msĕ si Bắc Giang jing mkŏ mjing thiăm 4.300 anôk mplĕ hră thiăm, čiăng mkăp kơ mnuih ƀuôn sang dôk bi ktlah ti sang, bi ktlah mklin sa anôk”.

Hlăk klei ruă tưp dôk mâo dleh dưi ksiêm dlăng, ƀiădah mâo êbeh 99% ênoh mnuih nao mplĕ hră ruah khua, klei anei bi êdah leh ai tiê bi hgŭm mguôp djuê ana, mmông dleh dlan, lông dlăng lŏ ƀuh klă ai ktang bi mguôp mŏng djuê ana. Kyua anăn, klei hriăm tal êlâo mơ̆ng hdră ruah pô bi ala Quốc hội gưl 15 lehanăn bi ala Hội đồng nhân dân dŭm gưl wưng thŭn 2021 – 2026 klă sĭt jing klei đăo knang, klei sa ai lehanăn klei đua klam mơ̆ng mnuih ƀuôn sang.

Khădah klei ruă tưp Covid 19 dôk mâo dleh ksiêm dlăng, ƀiădah mta mrâo mơ̆ng hdră ruah khua jing pô mgơ̆ng ruah ngă pô bi ala Quốc hội gưl 15 lehanăn bi ala Hội đồng nhân dân bi mlih leh hdră mtrŭt mjhar klei ruah khua. Bi hrô hŏng hdră mtrŭt mjhar klă anăp, phung mgơ̆ng ruah bi mlih jing hdră nao bi tuôm klă anăp lehanăn hluê hdră trực tuyến, mbĭt anăn bi hrŏ ênoh klei bi tuôm mkă hŏng klei hưn mdah tal êlâo. Dŭm alŭ wăl mtrŭt mđĭ leh bruă ba yua kdrăp mrâo, mđĭ lar tuič hnơ̆ng klei găl mâo mơ̆ng kdrăp hâo hưn, loa kčaĭ asăp mơ̆ng grăp alŭ wăl. Ti anôk dôk bluh mâo klei ruă lu, 2 čar Bắc Giang lehanăn Bắc Ninh tŭ lu klei hmăi kjham ƀiădah mâo leh lu hdră ngă bruă mrâo, đru mguôp yuôm bhăn mjing klei tŭ jing mơ̆ng hdră ruah khua. Bắc Giang mâo êbeh 4 êbâo huôm mplĕ hră, jing ênoh huôm mplĕ hră mkăp lu êdi mơ̆ng kluôm ala, dŭm êpul ruah khua nao leh grăp lŭ, khŏk ƀăng grăp boh sang. Khua anôk bruă sang čư̆ êa čar Bắc Giang Lê Ánh Dương mñă klă: Klei hriăm jăk êdi mơ̆ng hdră kiă kriê mơ̆ng Đảng, Knŭk kna, Quốc hội jing mta klei yuôm bhăn kñăm rơ̆ng klei tŭ jing mơ̆ng hdră ruah khua bŏ hŏng klei dleh dlan, lông dlăng hlăm wưng leh êgao: “Bruă hluê ngă hdră ruah khua hmei tĭng leh kơ hdră kčah hŏng dŭm krĭng bi ktlah, krĭng kwang dar lehanăn kơ mnuih ƀuôn sang dôk hlăm krĭng bi ktlah, krĭng kwang dar lehanăn krĭng kăm mkhư̆. Êngao kơ huôm mplĕ hră ti anôk phŭn snăn êpul ruah khua ăt dưm huôm mplĕ hră mkăp ti dŭm krĭng mâo mnuih ƀuôn sang amâo dưi kbiă mơ̆ng anôk bi ktlah dưi hluê ngă klei dưi ruah khua mơ̆ng pô.

Klă mngač hlăm klei hâo hưn dưi pô čuăn ruah, hưn mthâo mnuih mgơ̆ng ruah, mă klei blŭ mơ̆ng mnuih ƀuôn sang hŏng mnuih mgơ̆ng ruah čiăng dưi ruah mnuih năng ăt jing klei hriăm yuôm bhăn hlăm gưl ruah khua tal anei. Hluê si Ngô Sách Thực, K’iăng khua anôk bruă mặt trận čar kwar Việt Nam: Dŭm bruă djŏ tuôm kơ mnuih mgơ̆ng ruah dưi hưn mthâo klă mngač đru leh kơ mnuih ƀuôn sang nao ruah ênŭm 500 čô bi ala Quốc hội: “Phung mgơ̆ng ruah dưi ruah hluê hŏng dŭm hnơ̆ng čuăn hluê si klei kčah mtrŭn mơ̆ng Hdră bhiăn ruah khua, Hdră bhiăn mkŏ mjing Quốc hội lehanăn hluê si klei Ktrâo lač mrô 36 mơ̆ng Anôk bruă mkŏ mjing gưl dlông, Asăp mtrŭn mrô 45 mơ̆ng Phŭn bruă kđi čar djŏ tuôm kơ hdră ruah khua. Hlăm anăn, êngao kơ 3 hnơ̆ng čuăn hluê si klei kčah mtrŭn mơ̆ng hdră bhiăn msĕ si: Hnơ̆ng čuăn sĭt suôr hŏng ala čar, Hdră bhiăn phŭn; dŭm klei găl kơ klei thâo, knhuah hdĭp jăk, klei dôk dơ̆ng ƀơ̆ng huă, klei suaih pral, klei găl mă bruă knuă, klei bi mjĕ hŏng mnuih ƀuôn sang... ăt mñă klă phung bi ala brei mâo klei jhŏng, jhŏng mĭn, jhŏng ngă, jhŏng lač, ba anăp hlăm bruă hluê ngă dŭm hdră mtrŭn, hdră bhiăn mrâo”.

Sa klei hriăm yuôm dưi mâo hlăm gưl ruah khua tal anei jing hdră bi hgŭm plah wah Êpul hgŭm ruah khua ala čar, dŭm knơ̆ng bruă ruah khua čar, ƀuôn prŏng hŏng dŭm anôk bruă klei mrâo dăl giăm sa thŭn êgao. Anăn jing rơ̆ng klei kpă mngač, ngă phŭn mil pô, mtăp mđơr hlăm grăp bruă mprăp kơ hdră ruah khua. Mđĭ lar jăk bruă klam mơ̆ng anôk bruă mặt trận čar kwar Việt Nam lehanăn dŭm gưl bruă hlăm hdră mtrŭt mjhar mnuih ƀuôn sang kluôm ala nao hgŭm hlăm hdră ruah khua. Mơ̆ng anăn, mjing ai êwa đăo knang, hơ̆k m’ak hlăm hruê ruah khua, mđĭ klei thâo săng, klei đua klam hlăm bruă kđi čar mơ̆ng mnuih ƀuôn sang nao hgŭm mă bruă hlăm anôk bruă knŭk kna, bruă sang čư̆ êa dŭm gưl. Bùi Văn Cường, Khua hlăm anôk bruă Quốc hội, Khua adŭ bruă Quốc hội, Khua hlăm Êpul hgŭm ruah khua ala čar mñă klă: “Hdră mtô mblang mâo lu klei bi mlih mrâo lehanăn ba wĭt klei tŭ dưn, êpul mtô mblang dưi mprăp djăp ênŭm. Hdră mtô mblang ăt dưi mprăp klă nik lehanăn hdră mtô mblang mđing kơ dŭm bruă phŭn. Klei anei mjing ai êwa mrâo, hơ̆k m’ak, ktưn hưn kơ mnuih ƀuôn sang hlăm kluôm ala čar. Tinei, drei ƀuh phung khua kiă kriê Đảng, Knŭk kna, tơ hluê ngă klei dưi mơ̆ng mnuih ƀuôn sang snăn mâo nanao anôk bruă klei mrâo hưn mthâo pral, djŏ guôp, bi lar bra ai tiê mjing boh kdrŭt kơ drei hluê ngă tŭ jing hdră ruah khua”.

Klei tŭ jing mơ̆ng hdră ruah pô bi ala Quốc hội gưl 15 lehanăn bi ala Hội đồng nhân dân dŭm gưl wưng thŭn 2021 – 2026 brei ƀuh leh ai tiê djuê ana, klei hgŭm kngan kjăp phĭt, sa ai tiê mơ̆ng jih anôk bruă kđi čar, guh mngač nanao hlăm djăp boh klei dôk ƀuh mâo msĕ si klei ruă tưp, klei dleh dlan, lông dlăng. Klei sa ai lehanăn klei đua klam mơ̆ng giăm 70 êklăk čô mnuih ƀuôn sang jing mta phŭn yuôm bhăn đru mjing klei tŭ jing mơ̆ng hdră ruah khua tal anei msĕ si klei čih lač “Dleh dŭm êbâo blư̆ mâo mnuih ƀuôn sang sa ai ăt leh mơh”./.