VOV4.Êđê- Wưng mdei Knăm mkŏ mjing ala čar hruê 2/9 sui 4 hruê, ênưih ngă mđĭ hnơ̆ng tưp lar klei ruă tưp, mă klei hriăm mơ̆ng gưl mdei hruê 30/4 leh êgao, Khua knŭk kna mâo leh Asăp mtrŭn mtă kơ Khua anôk bruă sang čư̆ êa dŭm čar, ƀuôn prŏng hlăm Gưl dlông mđĭ lar ai tiê đua klam hŏng mta kñăm kyua klei suaih pral, klei hdĭp mơ̆ng mnuih ƀuôn sang; mđing kiă kriê, gĭt gai lehanăn mkŏ mjing hdră hluê ngă kjăp, mâo boh tŭ dưn dŭm hdră msir gang mkhư̆ klei ruă ti alŭ wăl. Boh nik, hŏng dŭm alŭ wăl dôk bi ktlah yang ƀuôn, brei mđĭ bruă hluê ngă kjăp hdră bi ktlah yang ƀuôn anei hluê si ai tiê “Ti anôk dôk hlŏng dôk tinăn”, điêt đuôt amâo dưi dôk bi nghi lu mnuih, amâo brei mnuih ƀuôn sang kbiă ti êlan lu hlăm wưng bi hdơr knăm mkŏ mjing ala čar, hruê 2/9; msir mghaih djŏ hdră bhiăn klei ngă soh hŏng hdră bhiăn gang mkhư̆ klei ruă tưp. Mkŏ mjing jăk hdră răng mgang klei êđăp ênang ala čar, klei êđăp ênang yang ƀuôn čiăng kơ mnuih ƀuôn sang čŏng pô hluê ngă, h’ĭt ai tiê nao hgŭm hlăm hdră gang mkhư̆ klei ruă. Rơ̆ng kjăp hdră mkăp mnơ̆ng dhơ̆ng, hdră bruă mdrao mgŭn hlăm wưng mdei knăm m’ak lehanăn hluê ngă hdră bi ktlah yang ƀuôn./.

Pô mblang: H’Nêč Êñuôl