VOV4.Êđê - K’iăng khua phŭn bruă tuh tia mnia mblei Đặng Hoàng An mâo leh klei bi blŭ hrăm hŏng k’iăng khua phŭn bruă tuh tia mnia mblei Serk Martina Tauberova kơ bruă mđĭ hĭng klei hgŭm duh mkra, mnia mblei dua ala čar, lehanăn mâo klei trông čhai kơ dŭm bruă prăp êmiêt kơ gưl khua knŭk kna Serk Andrej Babis hriê čhưn kơ Việt Nam. Ti anôk bi blŭ hrăm, k’iăng khua phŭn bruă tuh tia mnia mblei Đặng Hoàng An lač hlăm sa thŭn êgao, hŏng klei gĭr mơ̆ng Đảng, lăn čar, knŭk kna lehanăn klei sa ai mơ̆ng phung ƀuôn sang Việt Nam ngă tŭ jing leh bruă mdua mdrơ̆ng hŏng klei ruă tưp êjai, lehanăn krŭ wĭt bruă duh mkra êjai. K'iăng khua čang hmăng bruă mtrŭt mđĭ klei hgŭm bruă duh mkra mnia mblei, lehanăn klei duh bi liê mơ̆ng dua ala čar. K'iăng khua phŭn bruă hmăng hmưi kơ Phŭn bruă tuh tia mnia mblei dua ala čar lŏ dơ̆ng bi mguôp kjăp, mprăp ƀhĭ ênŭm kơ klei Khua knŭk kna Serk Babis hriê čhưn kơ Việt Nam. Ñu đăo knang hlăm gưl anăn srăng mđĭ klei hgŭm bruă mâo leh mơ̆ng đưm plah wah dua ala čar đĭ nao hlăm sa knhuang mrâo./.

Y Khem pô mblang