VOV4.Êđê - Phŭn bruă mdrao mgŭn brei thâo mơ̆ng ară anei truh knhal jih thŭn 2021, hnơ̆ng vaccin gang mkhư̆ Covid-19 srăng truh lu, kyua anăn dŭm alŭ wăl brei mprăp mnuih, kdrăp mnơ̆ng leh anăn dŭm klei găl čiăng êdi čiăng mđĭ hnơ̆ng pral tlŏ mgang kñăm mđĭ hnơ̆ng kluôm tlŏ vaccin. Mơ̆ng anăn mjing klei găl yuôm bhăn čiăng mdrơ̆ng êđăp ênang hŏng klei ruă tưp êjai, mđĭ kyar bruă duh mkra- ala ƀuôn êjai. Hluê si klei hưn mdah mơ̆ng Anôk bruă mdrao mgŭn gang mkhư̆ leh anăn Anôk bruă ksiêm hriăm kơ klei ruă tưp gưl dlông, truh jih hruê 10/10, Việt Nam tŭ mă êbeh 87 êklăk aruăt vaccin gang mkhư̆ Covid-19 leh anăn ngă leh 57 gưl mbha hŏng 81 êklăk 7 êtuh aruăt vaccin kơ dŭm alŭ wăl. Mĭn tĭng hlăm wưng kơ anăp, vaccin srăng dưi mâo lu. Čiăng rơ̆ng ba yua vaccin pral, tŭ dưn, Phŭn bruă mdrao mgŭn mtă kơ dŭm čar, ƀuôn prŏng dlăng bruă tlŏ vaccin gang mkhư̆ klei ruă Covid-19 jing bruă phŭn, mđing mrô sa hlăm wưng ară anei.

H Zawut pô mblang