VOV4.Êđê - Hruê 18-6, Phŭn bruă sang hră mtô bi hriăm mkŏ mjing klei bi kƀĭn online kluôm ala ksiêm wĭt 8 thŭn hluê ngă Hdră bruă “Mkŏ mjing yang ƀuôn tui hriăm wưng thŭn 2012-2020”. Hlăm klei bi kƀĭn, pô bi ala dŭm Phŭn, dhar bruă djŏ tuôm leh anăn dŭm alŭ wăl lač leh lu klei thâo, klei êdu kƀah hlăm bruă pŏk ngă dŭm mta phŭn mơ̆ng hdră bruă, mbĭt anăn kčĕ dŭm hdră msir čiăng bruă pŏk ngă hdră bruă wưng thŭn 2021-2030 tŭ dưn leh anăn klă sĭt hĭn. Hdră bruă “Mkŏ mjing yang ƀuôn tui hriăm wưng thŭn 2012-2020” kčah 4 hdră kñăm phŭn, leh 8 thŭn hluê ngă mâo 2 hdră kñăm bi leh: Lăm lui klei amâo thâo hră mơar leh anăn mđĭ klei tui hriăm; leh anăn hdră kñăm tui hriăm čiăng bi leh klei thâo hdĭp, mkŏ mjing klei hdĭp grăp čô mnuih leh anăn êpul êya ƀrư̆ hruê ƀrư̆ jăk mơak hĭn. Leh 8 thŭn pŏk ngă, hdră bruă mjing leh klei bi mlih hlăm klei thâo săng mơ̆ng dŭm alŭ wăl, mơ̆ng năn, bi leh anôk bruă bi hriăm mơ̆ng gưl nah gŭ čiăng hluê ngă bruă tui hriăm jih klei hdĭp kơ grăp kơ mnuih. Khua phŭn bruă sang hră Nguyễn Kim Sơn ăt brei thâo, hlăm wưng kơ anăp, Phŭn bruă srăng ktuê dlăng čiăng lač kơ klei tŭ dưn gru hmô ngă bruă mơ̆ng dŭm anôk bruă bi hriăm, mkra mđĭ grăp čô hgŭm hlăm hdră mđĭ kyar ala ƀuôn tui hriăm.

H Zawut pô mblang