VOV4.Êđê- Mrâo êgao, mkŏ mjing leh Klei bi kƀĭn online mơ̆ng Anôk bruă knŭk kna hŏng 27 boh čar, ƀuôn prŏng kwar Dhŭng mơ̆ng Phú Yên truh kơ Cà Mau kơ hdră gang mkhư̆ klei ruă Covid 19. Blŭ hrăm ti knăm anei, Khua knŭk kna Phạm Minh Chính mtă brei mđĭ lar ai ktang bi mguôp jih jang djuê ana, jih anôk bruă kđi čar, yang ƀuôn, mnuih ƀuôn sang, anôk bruă duh mkra đua klam lehanăn hrăm mbĭt hluê ngă hdră gang mkhư̆ klei ruă tưp.

 Hlăm klei bi kƀĭn, phung bi ala bi trông ksiêm dlăng boh klei ruă tưp Covid-19 ară anei leh anăn đaŏ knăl boh klei hlăm wưng kơ anăp; klei tŭ, klei êdu kƀah hlăm hdră hluê ngă dŭm bruă, boh nik kơ hdră gĭt gai, mkŏ mjing hluê ngă, klei bi hgŭm plah wah dŭm dhar bruă, alŭ wăl čiăng kơ bruă gang mkhư̆ klei ruă tưp tŭ dưn hĭn, hlăm ai tiê răng mgang klei suaih pral yang ƀuôn jing mrô sa, mđing mrô 1 ti dŭm alŭ wăl mmông anei jing gang mkhư̆ klei ruă Covid-19, dŭm anôk êđăp ênang, snăn ăt mđĭ lar mkra mjing, mđĭ kyar bruă duh mkra. Hâo hưn hlăm klei bi kƀĭn, Khua phŭn bruă mdrao mgŭn Nguyễn Thanh Long brei thâo, boh klei ruă tưp hlăm ala čar ăt lŏ dơ̆ng dleh ktuê dlăng:

“Lu ară anei jing kman mta mrâo Delta hlăm kluôm ala, mta mrâo anei ngă mâo klei truh jhat hŏng kluôm rŏng lăn. Ya ngă drei ƀuh tal anei ñu tưp lar hlue êpul, mâo lu snăk mnuih hlăm sa wưng snăn. Kyua klei êdah hlăm asei mlei mnuih ruă pral hĭn leh anăn wưng ñu đĭ lêč pral hĭn êlâo. Hmei ăt hưn răng hŏng dŭm alŭ wăl mdrơ̆ng hŏng klei ruă tưp amâo djŏ msĕ si dŭm gưl êlâo ôh, brei mdrơ̆ng hŏng hnơ̆ng pral hĭn, ktang hĭn, jih ai tiê hĭn.”

Ti anăp klei ruă tưp dleh ktuê dlăng, ƀuôn prŏng Hồ Chí Minh pral mdrơ̆ng, hluê si Khua ƀuôn prŏng Nguyễn Thành Phong, ƀuôn prŏng srăng mprăp kơ bruă sĭt mâo 20 êbâo čô mnuih ruă.

“Ti gŭ klei kpĭ mơ̆ng klei đĭ lêč kơ ênoh mnuih ruă êlâo kơ wưng hluê ngă Asăp mtrŭn mrô 16, ƀuôn prŏng kƀĭn mkra mđĭ leh anăn ba yua 5 boh sang dôk huâng mơ̆ng alŭ wăl anôk dôk mrâo ti ƀuôn hgŭm An Khánh, ƀuôn prŏng Thủ Đức hŏng hnơ̆ng 24 êbâo boh jhưng leh anăn anôk krŭ wĭt klei suaih pral hŏng klei mkŏ mjing mrâo mrang leh anăn đru kơ klei bi êwa sa blư̆ truh 1000 čô mnuih ruă, truh ară anei snăn ƀuôn prŏng dưi bi mklă mprăp leh kơ mdrơ̆ng tơdah mâo truh 20 êbâo čô mnuih ruă.

Klei bi kƀĭn online mơ̆ng Anôk bruă knŭk kna hŏng 27 čar, ƀuôn prŏng nah Dhŭng

 Leh hmư̆ dŭm klei blŭ bi trông čhai mơ̆ng dŭm alŭ wăl leh anăn phŭn dhar bruă, klah čŭn klei bi kƀĭn, Khua Knŭk kna Phạm Minh Chính bi mni kơ klei tŭ mơ̆ng ƀuôn prŏng Hồ Chí Minh leh anăn dŭm čar mâo leh hlăm wưng êgao, gĭr ktưn jih ai tiê, kyua klei suaih pral, klei hdĭp yang ƀuôn. Khua knŭk kna mtă brei mâo hdră msir ktang, jih ai tiê, ngă bi jăk, djŏ boh klei, mbruă, tŭ dưn hĭn čiăng gang mkhư̆ klei ruă tưp, dlăng bruă răng mgang klei suaih pral mnuih ƀuôn sang jing êlâo hĭn, amâo brei hlei pô kƀah mnơ̆ng ƀơ̆ng huă, mnơ̆ng yua aguah tlam hlăm mmông anei; ktuh êyuh mdrao mnuih ruă, mkhư̆ ƀiă hĭn mnuih djiê; răng mgang klei êđăp ênang ala ƀuôn kơ mnuih ƀuôn sang hlăm djăp klei mâo, kriê kjăp knông lăn, amâo brei klei mŭt kbiă soh hŏng hdră bhiăn, răng mgang kjăp dŭm kdrăp mnơ̆ng mkra mjing - anôk rơ̆ng mkăp mnơ̆ng dhơ̆ng. Kơ klei mĭn gĭt gai, Khua knŭk kna mñă brei mđĭ lar klei bi hgŭm djuê ana hlăm klei mdrơ̆ng hŏng klei ruă tưp:

“Sa ai tiê klei mĭn “mdrơ̆ng hŏng klei ruă tưp msĕ si mdrơ̆ng hŏng phung roh”, gĭr tŭ dưn dơ̆ng mơ̆ng klei gang mkhư̆ jing ksŭng ngă. Mă klei gang mkhư̆ jing phŭn, hdră ngă, sui thŭn mlan bi mklă. Iêu mkrum ai ktang bi hgŭm jih djuê ana, jih bruă kđi čar, êpul êya yang ƀuôn, anôk bruă mnia blei, êpul êya đua klam, hrăm mbĭt mdrơ̆ng hŏng klei ruă tưp, hluê ngă klei bhiăn, hdră mâo leh dŭm gưl kčah mtrŭn, ktrâo lač. Mđĭ lar ai tiê čŏng ngă, mbruă, pral mơ̆ng dŭm gưl, dŭm dhar bruă, alŭ wăl. Boh klei mrâo brei mâo klei ngă bruă mrâo, păn kjăp boh klei, mơ̆ng klei klă klơ̆ng hŏng hdră djŏ guôp, mđĭ lar jih hnơ̆ng klei mbruă. Grăp să, ƀuôn hgŭm, sang mkra mjing, anôk bruă brei jing kđông gang mkhư̆ klei ruă tưp, grăp čô mnuih jing lĭng kahan ba anăp hlăm djăp anôk bruă mdrơ̆ng hŏng klei ruă tưp.

Khua knŭk kna  Phạm Minh Chính

Êngao anăn, brei mpŭ klei tŭ djŏ guôp djŏ hdră bhiăn mơ̆ng mnuih ƀuôn sang, mđĭ klei tŭ dưn ngă bruă kyua mnuih ƀuôn sang. Gang mkhư̆ klei ruă tưp jing bruă klam, klei dưi mơ̆ng mnuih ƀuôn sang. Dŭm gưl bruă Đảng, bruă sang čư̆ êa, bruă kđi čar dŭm gưl brei bi êdah klă jing anôk mnuih ƀuôn sang đaŏ knang; mjing klei dleh dlan, lông dlăng jing boh kdrŭt ngă bruă kơ yang ƀuôn jăk hĭn. Iêu mthưr mnuih ƀuôn sang hgŭm, mđĭ ai mnuih ƀuôn sang ngă bi jăk dŭm klei kčah mtrŭn mơ̆ng Knŭk kna kơ hdră gang mkhư̆ klei ruă tưp leh anăn mkra mjing, mnia blei.  Tui hluê, mđĭ lar dŭm hdră hŏng klei tŭ, klei hriăm jăk, klei êdah êdi hlăm bruă mdrơ̆ng hŏng klei ruă tưp.

 Dŭm alŭ wăl mâo lu phŭn mtưp kƀĭn čuăl krĭng, hnưm hơĭt boh klei. Ba yua grăp mmông čiăng mđĭ bruă mkra mjing mnia blei; mkŏ mjing dŭm anôk đru dŏng, êlan hâo hưn pral, kdrăp mnơ̆ng djŏ guôp; ksiêm hriăm mkŏ mjing hla pŏk web hâo hưn čiăng mnuih ƀuôn sang lač djăp klei dleh dlan, gun kpăk hlăm grăp mnĭt mmông, čiăng mnuih ƀuôn sang hơĭt ai tiê đru mguôp, bi đru hlăm hdră gang mkhư̆ klei ruă tưp. Hlăm wưng ba yua dŭm Asăp mtrŭn 15,16 snăn brei ngă bi jăk bruă hâo hưn kơ mnuih ƀuôn sang, kriê dlăng klei hdĭp ai tiê kơ yang ƀuôn, bi hrŏ klei ngă mnuih ƀuôn sang amâo ư ai. Dŭm anôk bruă klei mrâo hmao, pral hâo hưn čiăng mnuih ƀuôn sang hgŭm hlăm hdră gang mkhư̆ nklei ruă tưp.

 Khua knŭk kna mtă dŭm gưl, dhar bruă, alŭ wăl gĭr hĭn, jih ai tiê mă bruă, ya bruă ngă bi leh bruă anăn, hnưm bi jih klei ruă tưp, ba klei hdĭp hơĭt kjăp kơ mnuih ƀuôn sang, hluê ngă tŭ dưn hdră kñăm mdua.

Pô mblang: H’Zawut Ƀuôn Yă