VOV4.Êđê- Hluê si K’iăng khua phŭn bruă mdrao mgŭn Nguyễn Trường Sơn, wưng dưi yap jing dleh dlan hĭn mơ̆ng hdră mdrơ̆ng hŏng klei ruă Covid 19 jing gưl 4 mơ̆ng hruê 23/8 truh hruê 30/9. Hlăm wưng anei, anôk bruă mdrao mgŭn pŏk leh hdră ksiêm dlăng kluôm lehanăn hluê ngă pral hĭn mkă hŏng hnơ̆ng tưp lar mơ̆ng kman SARS-CoV-2. Kyua anăn, ênoh mnuih mrâo ruă pral dưi hmao ƀuh, čiăng ba mdah dŭm hdră msir kriê dlăng, dŏng mdrao djŏ guôp. Anôk bruă mdrao mgŭn ăt mâo dŭm klei bi mlih hlăm hdră mkŏ mjing, dŏng mdrao kơ mnuih ruă Covid 19, ba yua êa drao ênuk mrâo... Kyua anăn, ênoh mnuih ruă mrâo, ênoh mnuih djiê hrŏ lehanăn ênoh mnuih dưi mdrao hlao dưi đĭ nanao hlăm grăp hruê. Klei ksiêm yap mơ̆ng Phŭn bruă mdrao mgŭn truh kơ ară anei brei ƀuh, ênoh mnuih ruă hlăm êpul êya hrŏ leh 44,7% mkă hŏng dua hruê kăm êlâo. Klei năng mđing, mâo leh 91% ênoh mnuih djŏ Covid-19 dưi mdrao hlao. Mâo leh 7 hlăm ênoh 62 čar, ƀuôn prŏng êgao leh 14 hruê amâo mâo mnuih ruă mrâo; 12 čar, ƀuôn prŏng amâo mâo mnuih lŏ ruă mrâo hlăm êpul êya 14 hruê êgao./.

Pô mblang: H’Nêč Êñuôl