VOV4.Êđê- Tlam 8-7, Phŭn bruă êlan klông dŭ mdiăng mâo hră mơar mjêč mơĭt kơ Knơ̆ng bruă sang čư̆ êa čar Lâm Đồng, Knơ̆ng bruă êdeh phiơr Việt Nam leh anăn Knơ̆ng bruă mdrao mgŭn êlan klông dŭ mdiăng kơ bruă mjưh mdei êjai dŭm gưl phiơr mơ̆ng ƀuôn prŏng Hồ Chí Minh nao ti Lâm Đồng leh anăn mklăk wĭt. Ti anăp klei dleh ktuê dlăng mơ̆ng klei ruă Covid 19, phung djŏ kman Sars- Cov-2 ti Lâm Đồng mâo phŭn mtưp mơ̆ng phung hriê leh anăn wĭt mơ̆ng ƀuôn prŏng Hồ Chí Minh, Knơ̆ng bruă sang čư̆ êa čar Lâm Đồng gĭt gai leh dŭm anôk bruă djŏ tuôm mdei êjai dŭm gưl dŭ mdiăng tuê mơ̆ng ƀuôn prŏng Hồ Chí Minh nao ti Lâm Đồng leh anăn mklăk wĭt. Hlăm anăn, êlan êdeh phiơr plah wah 2 alŭ wăl anei ăt dôk ngă bruă hŏng hnơ̆ng 5 gưl phiơr/hruê kăm, ngă hmaĭ leh anăn klei kpĭ ktang kơ bruă ktuê dlăng, gang mkhư̆ klei ruă Covid-19. Kyua anăn, Phŭn bruă êlan klông dŭ mdiăng bi tŭ ư hdră êlan Mjưh mdei dŭm gưl phiơr mơ̆ng ƀuôn prŏng Hồ Chí Minh nao ti Lâm Đồng leh anăn mklăk wĭt hluê si klei kčĕ mơ̆ng Knơ̆ng bruă sang čư̆ êa čar Lâm Đồng. Wưng ba yua mơ̆ng 0h hruê 9-7.

Pô mblang: H’Zawut Ƀuôn Yă