VOV4.Êđê- Hlăm klei bi lông mjuăt asei mlei êpul lĭng kahan lu ala čar Army Games 2021, Êpul lĭng kahan yang ƀuôn Việt Nam dôk tal 7/42 ala čar leh anăn krĭng lăn ala nao hlăm klei bi lông. Anăn jing klei hâo hưn hlăm knăm bi ruê̆ klei bi lông mjuăt asei mlei êpul lĭng kahan lu ala čar tal 7 (Army Games 2021) dưi mkŏ mjing ti Moscow, Liên bang Nga. Êpul lĭng kahan yang ƀuôn Việt Nam nao hlăm Army Games 2021 ti ala tač êngao bi leh jăk bruă klam dưi jao, mâo klei tŭ dưn jăk hĭn hlăm 4 gưl bi lông mjuăt asei mlei êpul lĭng kahan lu ala čar. Lu mta bi lông mâo klei tŭ jăk hĭn amâodah mdrăng hŏng thŭn dih wăt tơdah ênoh êpul bi lông mơ̆ng dŭm ala čar nao bi lông lu hĭn, leh anăn klei găl bi lông ăt dleh hĭn. Phung ksiêm dlăng klei bi lông anei lač, phung lĭng kahan yang ƀuôn Việt Nam dưi hriăm mjuăt jăk, boh nik bruă ba yua leh anăn răng mgang dŭm mta phao ktuang, kdrăp mrâo mrang.

Pô mblang: H’Zawut Ƀuôn Yă