VOV4.Êđê- Leh 2 hruê mă bruă, hruê 14/7, klei bi kƀĭn tal 58 mơ̆ng Dhar bruă gĭt gai bruă kƀĭn ala mkŏ mjing leh Klei bi kƀĭn mjưh ruê̆. Khua bruă kƀĭn ala Vương Đình Huệ mñă klă, truh kơ ară anei, jih jang bruă mprăp kơ klei bi kƀĭn tal 1, bruă kƀĭn ala gưl 15 ngă ruê̆ leh lehanăn mprăp kơ hruê mphŭn mkŏ mjing hlăm hruê 20/7 kơ anăp. Khua bruă kƀĭn ala Vương Đình Huệ mkă tĭng, klei bi kƀĭn mjing leh klei sa ai, boh nik hŏng hdră kčah 5 thŭn kơ hdră mđĭ kyar bruă duh mkra ala ƀuôn, kơ bruă duh bi liê knŭk kna, bruă ngăn prăk ala čar, hdră kčah čan prăk tla nư knŭk kna, bruă duh bi liê knŭk kna wưng 5 thŭn 2021-2026. Ăt msĕ hŏng Hdră kñăm ala čar kơ bruă mkŏ mkra krĭng ƀuôn sang mrâo lehanăn bi hrŏ ƀun h’ĭt kjăp wưng thŭn 2021-2025. Kơ hdră mprăp kơ klei bi kƀĭn tal 1 mơ̆ng anôk bruă kƀĭn ala, Khua bruă kƀĭn ala Vương Đình Huệ mtă, dŭm anôk bruă kƀĭn ala brei bi hgŭm kjăp hŏng Phŭn bruă mdrao mgŭn, dŭm anôk bruă djŏ tuôm ti ƀuôn prŏng Hà Nội mprăp čih mkra hdră kčah, hdră mdrơ̆ng djŏ guôp hŏng boh klei mâo mơ̆ng klei ruă tưp Covid 19 čiăng rơ̆ng klei êđăp ênang kơ klei bi kƀĭn tal 1, bruă kƀĭn ala gưl 15./.

                                                    Pô mblang: H’Nêč Êñuôl