VOV4.Êđê - Tlam mbruê, khua bruă Đảng gưl dlông, khua kiă kriê dhar bruă mặt trận čar kwar Việt Nam Đỗ Văn Chiến tŭ mă leh ênoh prăk bi mguôp hŏng ênoh 1 êklai prăk mơ̆ng knơ̆ng bruă mđĭ kyar Nam Bình Xuyên Green Park đru mguôp hlăm hdră “Êklăk hnư mnơ̆ng bi mguôp đru kơ mnuih ƀuôn sang krĭng dhŭng dưi găn klei ruă tưp Covid-19”. Truh kơ ară anei, dhar bruă mặt trận čar kwar Việt Nam dưi mkăp brei leh prăk hŏng ênoh 117 êklai prăk đru kơ ƀuôn prŏng Hồ Chí Minh lehanăn dŭm čar krĭng dhŭng hŏng hdră anei. Khua kiă kriê dhar bruă mặt trận čar kwar Việt Nam Đỗ Văn Chiến mnă klă, srăng hmao mơĭt ênoh prăk anei truh kơ mnuih ƀuôn sang čiăng mđĭ ai diñu dưi găn dŭm hruê mmông gang mkhư̆ klei ruă tưp Covid-19. Đỗ Văn Chiến hmăng hmưi, hruê mmông kơ anăp lŏ mâo lu klei bi mguôp jăk hrăm mbĭt hŏng mặt trận đru kơ mnuih ƀuôn sang dưi găn jih dŭm klei dleh dlan mơ̆ng klei truh yan adiê, klei ruă tưp.

Y Ƀel pô mblang