VOV4.Êđê - Khua knŭk kna mrâo bi mklă bruă klam čuăl mkă čar Lâm Đồng hlăm wưng 2021 – 2030, klei tă hdră truh ti thŭn 2030 hŏng mta kñăm mđĭ kyar pral, kluôm ênŭm lehanăn h’ĭt kjăp, ba Lâm Đồng jing čar đĭ kyar mơ̆ng kluôm ala. Mtrŭt mđĭ hdră mkŏ dăp bruă duh mkra, mđing kơ hdră mkŏ dăp bruă ngă lŏ hma, mđing truh kơ bruă lŏ hma kluôm ênŭm lehanăn mrâo mrang, jing anôk ksiêm hriăm, mkra mjing ngă lŏ hma ba yua kdrăp mrâo hnơ̆ng ala čar lehanăn tar rŏng lăn, mđĭ kyar bruă hiu čhưn ênguê tŭ jăk, mkŏ mkra ƀuôn prŏng Đà Lạt lehanăn krĭng djiêu gah jing wăl anôk hiu čhưn ênguê mơ̆ng ala čar, krĭng Ngŏ Dhŭng Asi lehanăn jing anôk bruă ksiêm duah, hŏng klei mĭn mrâo kdrăp kreh knhâo. Hluê anăn, tă hdră êlan mđĭ kyar, mkŏ dăp lehanăn kah mbha mnuih mă bruă hlăm hdră duh mkra – ala ƀuôn Lâm Đồng, mđing truh kơ hdră mđĭ kyar pral lehanăn h’ĭt kjăp hŏng 3 bruă phŭn: Lŏ hma mrâo, hiu čhưn ênguê – dŭm bruă nah tluôn tŭ jăk; Bruă tuh tia mkra mjing hluê hdră hrŏng ruah, mđing mđĭ kyar dŭm anôk bruă tuh tia mkra mjing ênuk mrâo, jăk găl hŏng wăl hdĭp mda./.

H Nêč pô mblang