VOV4.Êđê- Hrue hđeh êlăk lehanăn ăt jing hrue tal êlâo mơ̆ng mlan ngă bruă kyua phung hđeh thŭn 2021. Hŏng akŏ jing “Hrăm mbĭt rơ̆ng bi mâo klei dưi êngiê kơ phung hđeh, răng mgang phung hđeh mơ̆ng klei jŭ jhat truh, klei ruă tưp”. Bruă ngă yuôm bhăn tal êlâo hlăm mlan anei, anăn jing keh đru răng kriê phung hđeh Việt Nam lehanăn Phŭn bruă mnuih ngă bruă, phung knap mñai bi klă leh đru klei huă ƀơ̆ng kơ êbeh 4 êbâo čô hđeh jing F0, lehanăn F1 dôk bi ktlah lehanăn mdrao mgŭn, kñăm gang mkhư̆ klei ruă tưp covid 19. Tui si klei bi klă anei, hđeh mơ̆ng mrâo kkiêng truh 16 mlan dôk mdrao mgŭn, dôk bi ktlah sa anôk srăng dưi đru prăk huă hŏng ênoh đru jing 80 êbâo prăk/hrue/hđeh hlăm 21 hrue bi ktlah. Wưng ba yua mơ̆ng hrue 27/4 truh hrue 31/12/2021. Keh răng mgang phung hđeh Việt Nam iêu mthâr jih jang mnuih mđrăm mbĭt ngă klei bi đru kơ phung hđeh dưi găn klei dleh dlan ară anei, ba klei jăk yâo kơ hđeh mgi dih./.

Pô mblang: Y-Khem Niê