VOV4.Êđê- Hdră mtô mblang mđĭ klei thâo hlăm hdră gang mkhư̆ klei ruă Covid 19 ti krĭng ƀuôn sang mâo boh tŭ yuôm êdi, boh nik hlăm wưng mâo lu mnuih dôk ti krĭng bluh mâo klei ruă wĭt kơ ƀuôn sang. Amai Nguyễn Thị Phương (djuê ana Tày) ti să čư̆ Mgar, kdriêk Čư̆ Mgar, čar Dak Lak hŏng hdră hưn mthâo mrâo mơ̆ng pô, anăn jing čih mmčeh klei mmuñ Then hluê boh phŭn gang mkhư̆ klei ruă Covid 19. Boh blŭ ênưih thâo săng, jĕ giăm hŏng klei hdĭp aguah tlam, mâo dŭm boh phŭn klă nik dưi bi êdah hŏng đŏk mmuñ êdu ê’un jăk jĭn hmư̆, ngă kpư̆ mgei ai tiê lu mnuih. Dŭm kdrêč video mơ̆ng amai Phương dưi hưn mthâo leh hlăm hla pŏk web yang ƀuôn Facebook, Youtube mâo leh ai lar bra hlăm yang ƀuôn.

 Anei jing dŭm klei mmuiñ mơ̆ng amai Nguyễn Thị Phương, djuê ana Taỳ, ti alŭ 5, să Čư̆ M’Gar, kdriêk Čư̆ Mgar, čar Dak Lak čŏng čih klei muiñ then djuê ana Tày- Nùng leh anăn mmuiñ. Hlăm klei mmuiñ amai Phương mâo kdrêč: “Bi kdơ̆ng hŏng klei ruă tưp msĕ si bi kdơ̆ng hŏng phung roh, drei hrăm mbĭt sa ai tiê msưh kdŭn klei ruă Covid-19… Grăp čô jing lĭng kahan sơaĭ, drei hrăm mbĭt hgao jih klei dleh dlan”…

Amai Nguyễn Thị Phương mmuiñ hlăm hla pŏk web ala ƀuôn

 Hŏng pruê mmuiñ siam, jăk ƀiădah ba leh kluôm ênŭm ai tiê gĭt gai “bi kdơ̆ng hŏng klei ruă tưp msĕ si phung roh” mơ̆ng Khua Knŭk kna, klei hâo hưn “5K” mơ̆ng Phŭn bruă mdrao mgŭn hlăm hdră gang mkhư̆ klei ruă tưp. Mơ̆ng anăn, mđĭ ai grăp čô hluê ngă bi jăk klei kčah mtrŭn gang mkhư̆ klei ruă tưp, mâo ai tiê mơak, đaŏ knang srăng msưh kdŭn klei ruă tưp leh anăn lŏ wĭt klei hdĭp êđăp ênang.

 Hŏng knŏng dŭm hruê čih hlăm hla pŏk web ala ƀuôn Facebook leh anăn Youtube, klei muiñ mâo leh dŭm êbâo gưl dlăng, dŭm êtuh gưl blŭ hrăm leh anăn kah mbha. Ayŏng Nguyễn Trung Hải, djuê ana Tày, ti wăl krah Quảng Phú, kdriêk Čư̆ Mgar dlăng video dưi kah mbha hlăm Facebook brei thâo:

            “Mơ̆ng leh dlăng video amai Phương mmuiñ kâo ƀuh jăk snăk, asăp mmuiñ, ênai ƀrô̆. Klei muiñ mđĭ ai tiê mnuih ƀuôn sang dŭm djuê ana sa ai tiê mdrơ̆ng hŏng klei ruă tưp, hŏng boh klei ară anei jing djŏ guôp. Bruă yua brô̆ tính, ênhiang muiñ djuê ana čiăng hâo hưn, mnuih ƀuôn sang dưi hmư̆ klei hâo hưn hŏng asăp mmuiñ djuê ana, ênai brô̆ djuê ana pô đru kơ mnuih ƀuôn sang ênưih thâo săng. Kâo pô leh anăn hlei pô hmư̆ leh klei amai Phương mmuiñ khăp snăk leh anăn mâo klei thâo săng gang mkhư̆ klei ruă tưp ênưih hĭn.

Amai Nguyễn Thị Phương hlăm kdrăp čŭt hơô djuê ana mmuiñ then

            Amai Nguyễn Thị Phương brei thâo, jih dŭm hruê êgao, ñu hŏng phung hlăm êpul gang mkhư̆ klei ruă tưp ti alŭ, să dôk gĭr hâo hưn kơ klei gang mkhư̆ klei ruă tưp kơ mnuih ƀuôn sang, ăt msĕ mơh đru kơ êpul nah tluôn ti wăl bi ktlah hjăn kơ phung mă bruă wĭt mơ̆ng dŭm čar mâo klei ruă tưp. Hnêč mmông mdei, amai Phương dlăng hlăm internet dua klei mmuiñ siam amâodah mâo dŭm boh phŭn kơ hdră gang mkhư̆ klei ruă tưp čiăng mjing ênhiang mmuiñ then leh anăn muiñ, mdar video dưm hlăm hla pŏk web ala ƀuôn. Hluê si Amai Phương, mmuiñ then brô̆ tính jing sa mta amâo dưi kƀah ôh hlăm klei hdĭp djuê ana Tày- Nùng.  Ti alŭ ñu hdĭp leh anăn dŭm alŭ riêng gah mâo lu phung Tày- Nùng hdĭp mda anăn hdră hâo hưn anei đru kơ mnuih ƀuôn sang ênưih hmư̆ leh anăn ênưih hdơr hĭn.

   “Ƀuh klei mnuih ƀuôn sang mđĭng hmư̆ hŏng hdră pô ngă snăn kâo ƀuh mơak snăk. Khă gơ̆ ară anei kâo kpăk lu bruă đru gang mkhư̆ klei ruă tưp ti să, ƀiădah anăp truh kâo srăng gĭr pioh lu mmông hriăm lu ênhiang then mrâo leh anăn klei muiñ djŏ guôp hĭn čiăng lŏ dơ̆ng mmuiñ then hâo hưn kơ mnuih ƀuôn sang.”

Amai Nguyễn Thị Phương iêu jak đru mguôp hlăm keh gang mkhư̆ klei ruă Covid-19

 Hồ Thị Thanh Hải, Khua bruă mặt trận să Čư̆ M’Gar brei thâo, mnuih djuê ana Tày - Nùng mâo êbeh 16% ênoh mnuih ƀuôn sang kluôm să. Lu jing mnuih ƀuôn sang hlăm gưl thŭn mă bruă  ti să ară anei nao mă bruă ti dŭm čar Bình Dương, Đồng Nai leh anăn ƀuôn prŏng Hồ Chí Minh.  Dŭm hruê êgao, leh dŭm čar anei bi ktlah yang ƀuôn hluê si Asăp mtrŭn mrô 16, lu mnuih mă bruă wĭt leh ti pưk sang čiăng ñĕ kơ klei ruă tưp. Kyua anăn, mbĭt hŏng bruă iêu jak đru leh anăn mă dŭm klei găl mnơ̆ng dhơ̆ng kơ hdră gang mkhư̆ klei ruă tưp, snăn bruă hâo hưn mđĭ klei thâo săng leh anăn klei bi hgŭm mơ̆ng mnuih ƀuôn sang jing yuôm bhăn snăk. Jing Khua Anôk bruă mặt trận alŭ, hlŏng ngă Khua êpul phung mniê să, amai Nguyễn Thị Phương  mâo leh lu bruă ngă hŏng dŭm êpul gang mkhư̆ klei ruă tưp. Hlăm anăn, yua klei mmuiñ then čiăng hâo hưn hdră ngă jing hdră ngă mrâo, djŏ guôp hŏng klei khăp kưt muiñ lu mnuih ti alŭ wăl.

“Amai Phương jing sa hlăm phung knuă druh hur har ngă hlăm djăp hdră ti alŭ wăl, nah dlông đaŏ knang nanao kơ ñu leh anăn mnuih ƀuôn sang khăp hơiêng. Hlăm wưng êgao ñu yua leh ênhiang mmuiñ then djuê ana pô čiăng hâo hưn kơ mnuih ƀuôn sang hlăm hdră gang mkhư̆ klei ruă tưp. Anei ăt jing hdră ngă mrâo, tŭ dưn hŏng să Cư̆ Mgar leh anăn kluôm kdriêk Čư̆ Mgar.”

            Mmuiñ then, brô̆ tính jing sa mta mnơ̆ng amâo dưi kƀah ôh mơ̆ng lu mnuih Tày -  Nùng ti alŭ wăl. Mđĭ lar klei jăk, klei siam mơ̆ng dŭm ênhiang mmuiñ djuê ana leh anăn kdrăp tông ayŭ djuê ana, amai Nguyễn Thị Phương čih klei muiñ mrâo djŏ guôp čiăng hâo hưn mdrơ̆ng hŏng klei ruă tưp msĕ si bi kdơ̆ng hŏng phung roh, ăt msĕ mơh klei suăi êmăn mơ̆ng êpul gang mkhư̆ klei ruă tưp ti anôk phŭn, mơ̆ng anăn iêu mthưr mđĭ klei thâo săng mnuih ƀuôn sang hrăm mbĭt gang mkhư̆ leh anăn msưh kdŭn klei ruă Covid-19.

Pô mblang: H’Zawut Ƀuôn Yă