VOV4.Êđê - Aguah hruê 23/5, hrăm mbĭt hŏng ai êwa mơ̆ng kluôm ala, êbeh 427 êbâo čô mnuih ƀuôn sang hlăm čar Dak Nông ti 680 krĭng mplĕ hră hluê ngă leh hdră nao ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026.

Hlăm ai êwa hơ̆k m’ak mơ̆ng Hruê m’ak jih jang djuê ana, ti krĭng mplĕ hră mrô 4, Bon N’JRiêng, bon Bu Sop ti să Dak Nia, ƀuôn prŏng Gia Nghĩa, êbeh 900 čô bi ala nao leh ti Knăm m’ak mphŭn pŏk hruê ruah khua mơ̆ng hnưm lehanăn hluê ngă klei dưi mơ̆ng sa čô mnuih ƀuôn sang. K’Bơn, ti ƀuôn Dinh, să Dak Nia, ƀuôn prŏng Gia Nghĩa lač: “Aguah anei hlăm brô 6h krah mnuih ƀuôn sang nao leh ti anôk ruah khua. Mnuih ƀuôn sang ăt hluê ngă hdră gang mkhư̆ klei ruă msĕ si truă čhiăm guôm ƀô̆, rao êa bi mdjiê kman, dôk kbưi hŏng mnuih mkăn hlăm brô 2m hluê si klei mtă mơ̆ng Phŭn bruă mdrao mgŭn. Gŏ sang kâo ăt hluê ngă kjăp hruê mmông bi kčah nao ruah lehanăn ruah djŏ mnuih mâo klei năng, thâo, mnuih mâo k’hưm”.

H’Nêč pô mblang